කොළඹ LNW: අනිවාර්ය නිවාඩු ගන්වන ලද රාජ්‍ය බුද්ධි සේවයේ හිටපු අධ්‍යක්ෂ ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන මහතාව සේවයෙන් පහකිරීමට ජාතික පොලිස් කොමිසම තීරණය කර තිබේ.
පාස්කු ප්‍රහාරය එල්ල වන විට ඔහු රාජ්‍ය බුද්ධි සේවයේ අධ්‍යක්ෂවරයා ලෙස කටයුතු කරමින් සිටි අතර එම ප්‍රහාරය සම්බන්ධයෙන් විමර්ශනයට පත් කළ ජනාධිපති විමර්ශන කොමිෂන් සභාවේ නිර්දේශය අනුව නිලන්ත ජයවර්ධන මහතාට එරෙහිව අපරාධ පරීක්ෂණයක් සහ විනය පරීක්ෂණයක් කිරීමට නිර්දේශ කර තිබුණි.
ඒ අනුව පැවති විනය පරීක්ෂණයේදී නිලන්ත ජයවර්ධන මහතාට එරෙහිව ගොනුකර තිබුණු චෝදනාවලට වරදකරු වීම නිසා ඔහුව සේවයෙන් පහකිරීමට ජාතික පොලිස් කොමිසම තීරණය කර ඇත.
ඊයේ (17) දින රැස්ව ඇති ජාතික පොලිස් කොමිසමේ සැසි වාරයේදී උක්ත තීන්දුව ප්‍රකාශ කර තිබේ.
ආශිකා බ්‍රාහ්මණ
