ජූලි 22, කොළඹ (LNW): ශ්රී ලංකාවේ පැණ නැඟී තිබෙන දැවෙන ගැටළුවක්වන ළමා දරිද්රතාවය තුරන් කිරීම සඳහා වූ පරිපූර්ණ ජාතික වැඩපිළිවෙලක් වහා ක්රියාත්මකකළ යුතු බව විපක්ෂ නායක සජිත් ප්රේමදාස මහතා සඳහන් කරයි.
ඔහු මේ බව පවසා සිටියේ, අද (22) දින මහගම සේකර මහා විද්යාලයේ පැවති උත්සවයක් අමතමිනි.
මෙරට දරුවන්ගෙන් සියයට 25 ක් තරම් වූ ප්රමාණයක් දරිද්රතාවයෙන් පෙළෙන අතර, සියයට 42 ක් බහුමාන දරිද්රතාවයෙන් පෙළෙන බව ජාත්යන්තර සමීක්ෂණ මඟින් අනාවරණය වී ඇති බව ප්රේමදාස මහතා සැලකර සිටියේය.
ඒ අනුව, මෙම අර්බුදයේ බරපතලකම අවබෝධ කොට ගනිමින් ළමා දරිද්රතාවය තුරන් කිරීම සඳහා ජනාධිපති කාර්ය සාධන බලකායක් නිර්මාණය කිරීමේ වැදගත්කම හෙතෙම අවධාරණය කළේය.
මෙම වැඩපිළිවෙල දිවයිනේ දිස්ත්රික්ක 25 තුළම දිස්ත්රික් ලේකම් කාර්යාල හරහා ක්රියාත්මකකළ යුතු බව පෙන්වා දුන් විපක්ෂ නායකවරයා, ඒ අනුව බිම් මට්ටමින් ම මෙම ගැටළුව ආමන්ත්රණයකළ හැකි බව පෙන්වා දුන්නේය.
ළමා දරිද්රතාවය සම්බන්ධයෙන් රජයේ අවධානය යොමු නොවී තීබීම විවේචනයට ලක්කළ විපක්ෂ නායක සජිත් ප්රේමදාස මහතා, ළමා දරිද්රතාවයේ අහිතකර ප්රතිවිපාකයන් පවතින බව, හා මෙය නොනවතින චක්රයක් ලෙස රටතුළ හටගනිමින් පවතින අර්බුදයක් බව පෙන්වා දුන්නේය.
එමෙන්ම, දරිද්රතාවය තුළින් දරුවන්ගේ අධ්යාපනය ඇණහිටින බවත්, ඉන් අධ්යාපන කාර්යසාධනය අතින් දරුවන් දුර්වලවන බවත්, එය රැකියා වියුක්තිය ඉහළ යාමට හේතුවන බවත් ඔහු වැඩිදුරටත් අවධාරණය කළේය.
