ජුලි මාසය අවසන් වනවිට මෙරට උද්ධමනය තනි ඉලක්කමකට පැමිණෙනු ඇති බව ශ්‍රී ලංකා මහබැංකුවේ අධිපති, ආචාර්ය නන්දලාල් වීරසිංහ මහතා පවසයි.
“උද්ධමනය ඉහළ යාම ගැන අවධානය වැඩිවුණේ එය 70%ක් දක්වා වැඩිවීමත් සමඟයි. සමහරු හිතුවා එය 100%ක් දක්වා ඉහළ යාවි කියලා. එහෙත් බහුතරයක් දෙනාගේ විවේචනයට ලක්වුණු දැඩි මූල්‍ය ප්‍රතිපත්තියේ ප්‍රතිඵලයක් හැටියට අපට පුළුවන් වුණා ඉතා දැඩි මූල්‍ය කොන්දේසි හඳුන්වා දෙන්න. එහි ප්‍රතිඵලයක් විදියට මේ මාසය අවසන් වෙනකොට තනි ඉලක්කමක උද්ධමන අගයක් දකින්න පුළුවන් මට්ටමක තමයි අපි දැන් ඉන්නේ. ජුලි මාසය අවසන් වනවිට 7%ක උද්ධමනයක් තමයි පුරෝකථනය කරන්නේ. මේ මාසය අවසන් වනවිට උද්ධමනය ඊටත් වඩා අඩු අගයක් ගන්නත් ඉඩ තියෙනවා”
ආචාර්ය නන්දලාල් වීරසිංහ මහතා මේ බව පැවසුවේ ශ්‍රී ලංකාවේ වරලත් මූල්‍ය විශ්ලේෂක සමාජය විසින් සංවිධානය කරන ලද විධායක නිලධාරීන්ගේ හමුවක් අමතමිනි.
RN
