සටහන – රුවන් නෙළුගොල්ල
ශ්‍රී ලංකා පොදුජන පෙරමුණ පොහොට්ටුව ලකුණ යටතේ ජනාධිපතිවරණ අපේක්ෂකයකු ඉදිරිපත් කිරීමට තීරණය කිරීමත් සමග එම තීරණය විරුද්ධ වූ මැති ඇමතිවරුන් ඇතුළු කණ්ඩායමක් ඊයේ (29) රාත්‍රියේ විශේෂ සාකච්ඡාවක් පවත්වා තිබේ.
ඒ, කොළඹ මල්පාරේ පිහිටි එක්සත් ජාතික පක්ෂ සභාපති වජිර අබේවර්ධන මහතාගේ කාර්යාලයේදී ය.
එම සාකච්ඡාවට ජනාධිපති රනිල් වික්‍රමසිංහ මහතා ද එක්වී ඇත.
එහිදී එම මැති ඇමතිවරුන් ප්‍රකාශ කර ඇත්තේ ශ්‍රී ලංකා පොදුජන පෙරමුණේ තීරණය කෙසේවුවත් තමන් ජනාධිපතිවරණයේදී රනිල් වික්‍රමසිංහ මහතාට සහාය පළ කරන බවයි.
මෙම සාකච්ඡාව සඳහා අමාත්‍ය කංචන විජේසේකර, රාජ්‍ය අමාත්‍යවරුන් වන දිළුම් අමුණුගම, අනුප පැස්කුවල්, ගීතා කුමාරසිංහ සහ පාර්ලිමේන්තු මන්ත්‍රීවරුන් වන මහින්දානන්ද අලුත්ගමගේ, එස්.බී. දිසානායක, ප්‍රේම්නාත් සී. දොලවත්ත ඇතුළු පිරිසක් සහභාගී වී සිටි බවයි වාර්තා වන්නේ.
