කොළඹ කොටස් වෙළෙඳපොල ඉතිහාසයේ පළමු වරට S&P SL20 දර්ශකය ඒකක 6,000 සීමාව ඉක්මවා යාමට අද (19) දිනයේදී සමත් විය.
ඒ අනුව අද දින ගනුදෙනු අවසානයේ දී ඒකක 58.46ක වර්ධනයක් සනිටුහන් කරමින් S&P SL20 දර්ශකය ඒකක 6,055.92ක් ලෙසින් සටහන් වී තිබිණි.
එසේම අද දිනයේ දී සියලු කොටස් මිල දර්ශකය ද මෙතෙක් ඉතිහාසයේ ඉහළම අගයේ වාර්තාව යළි අලුත් කරමින් ඒකක 20,571.07ක් දක්වා ඉහළ ගොස් තිබුණේ පෙර දිනයට සාපේක්ෂව ඒකක 100.55ක වැඩිවීමක් සමගිනි.
රු. බිලියන 10.85ක ගනුදෙනු පිරිවැටුමක් අද දිනය තුළ වාර්තා විය.
කොළඹ කොටස් වෙළඳපොලේ ලැයිස්තුගත සමාගම් අතුරින් අවම මට්ටම සම්පුර්ණය කරන්නාවූ වෙළෙඳපොල ප්‍රාග්ධනීකරණයකින් යුත් සමාගම් අතරින් විශාලත්වය (වෙළෙඳපොල ප්‍රාග්ධනීකරණය), ද්‍රවශීලතාව හා මූල්‍ය ශක්‍යතාව යන සාධක කෙරෙහි අවධානය යොමුකොට තෝරාගත් සමාගම් 20ක් S&P SL20 දර්ශකය ගණනය කිරීමට භාවිත කරනු ලබයි.
S&P ශ්‍රී ලංකා 20 දර්ශකයට අන්තර්ගතවීම සඳහා එක සමාගමක් සතුව අවම වශයෙන් රුපියල් මිලියන 500ක චලිත වෙළෙඳපොල ප්‍රාග්ධනීකරණයක් තිබීම, මාස 6ක මධ්‍යස්ථ දෛනික ගනුදෙනු වටිනාකම රුපියල් මිලියන 0.25කට නොඅඩුවීම, නැවත සංසන්දනය කිරීම සිදුකරන දිනයට පෙර මාස තුනක කාලය තුල එක මසකදී අවම වශයෙන් දින 10 කදී ගනුදෙනු වී තිබීම හා එම දිනයට පෙර මාස 12ක කාලය තුළ ලාභ උපයා තිබීම අවශ්‍ය වේ.
