සෑම අඟහරුවාදා දිනකම “Tasty Tuesdays” තුළින් ඔබට ආහාර පාන, රෙසිපීස් හැඳෙන හැටි, රෙස්ටුරන්ට් රිවීව්ස්, වයිරල් යන ඩිෂස්, මෙන්ම සංස්කෘතික ආහාර රටාවන් පිළිබඳ මනා අවබෝධයක් ලබා ගත හැකි වනු ඇත. රැඳී සිටින්න අප සමඟ!
සටහන – පුලී
අගෝස්තු 19, කොළඹ (LNW): ශ්‍රී ලංකාවට ජාතික වශයෙන් අනන්‍ය වූ ස්ට්‍රීට් ෆුඩ් සම්භවයෙහි ආහාරයක් තිබේ නම්, “කොත්තු රොටී” පහසුවෙන් එම කිරුළට හිමිකම් කියයි. එය සද්දෙත් සමඟ හැදෙන රසවත්, පිරුණු සහ ලාංකේය සංස්කෘතික නිරූපකයක් බවට පත්ව ඇත.
🍴 කොත්තු රොටියේ සුළ මුල!
කොත්තු රොටි (බොහෝ විට කොත්තු රොටි හෝ සරලව කොත්තු ලෙස උච්චාරණය කරනු ලැබේ) යනු ඉරා දැමූ ගෝදම්බ රොටී, එළවළු, බිත්තර, කුකුල් මස් හෝ හරක් මස් හෝ මුහුදු ආහාර වැනි දෑ එකට දමා කලවම් කරන ලද වීදි ආහාරයකි. එහි විශේෂත්වය වන්නේ කොත්තු රොටී සැකසෙන්නේ රොටී කපා කුළුබඩු, සෝස් සමඟ මිශ්‍ර කර උණුසුම් පැතලි තාච්චුවක් මත ලෝහ ස්පටුලස් දෙකක් උපයෝගී කරගෙන රිද්මයානුකූලව ගැටීම සමඟයි. එම ශබ්දය ලංකාවේ රෑ ජාමයේ එළිබහින ඕනෑම අයෙකුට වීදිවල ඇසෙන නොවරදින හඬ පටයක් කීවොත් මා නිවැරදිය.
කොත්තුව පිළිබඳ කෙටි ඉතිහාසයක්!
• සම්භවය: කොත්තු රොටී 1960-70 ගණන්වල නැගෙනහිර ශ්‍රී ලංකාවේ (සමහරු මඩකලපුවේ හෝ ත්‍රිකුණාමලයේ යැයි කියනු ලැබේ) ඉතිරි වූ රොටී භාවිතා කිරීමේ උපායමාර්ගයක් ලෙස සොයා ගත් බව විශ්වාස කෙරේ.
• වීදි ආහාර සංස්කෘතිය: එය ඉක්මනින් දිවයින පුරා ව්‍යාප්ත වූ අතර, කම්කරුවන්, සිසුන් සහ සංචාරකයින් අතර ජනප්‍රිය වූ රාත්‍රී ආහාරයක් බවට පත් විය.
• ශ්‍රී ලංකාවෙන් ඔබ්බට: අද, ලොව පුරා සිටින ශ්‍රී ලාංකික ප්‍රජාවන් ලන්ඩන්, ටොරොන්ටෝ, සිඩ්නි සහ ඩුබායි වැනි ස්ථානවල සම්ප්‍රදාය ජීවමාන කරමින් අවන්හල්වල කොත්තු නිපදවීමට ද පෙළඹී ඇති බව වාර්තා වෙයි.
🥘 කොත්තුව හදන්නේ කොහොමද?
කොත්තු සැකසීමට අවශ්‍ය මූලික අමුද්‍රව්‍ය :
• ගෝදම්බා රොටී – තුනී තීරු කපා
• කුකුල් මස්/ හරක් මස්/ එළුමස්/ මුහුදු ආහාර/ බිත්තර
• එළවළු – කැරට්, ලීක්ස්, ළූණු, ගෝවා, අමු මිරිස්.
• කුළුබඩු – කරි කුඩු, මිරිස් කැබලි,මිරිස් කුඩු, ලුණු, කළු ගම්මිරිස්, සෝයා සෝස්
• සුදුළූණු, ඉඟුරු
කොත්තුව පදමට සකසා ගන්නා ආකාරය;
1. රොටි තුනී කෑලි වලට කපන්න.
2. විශාල පැතලි තාච්චුවක් තෙල් සමඟ රත් කරන්න.
3. සුදුළූණු, ඉඟුරු, කරි කුඩු, මිරිස් කැබලි,මිරිස් කුඩු, ලුණු, කළු ගම්මිරිස්, සෝයා සෝස් එකතු කරන්න.
4. එළවළු සහ ඔබ යොදන මස් වර්ගයක් හෝ බිත්තර එකතු කරන්න.
5. ස්පටුලස් සමඟ අඛණ්ඩව රිද්මයට රොටි කෑලි අනෙකුත් දෑ සමඟ මිශ්‍ර කරන්න.
6. අමතර රසය සඳහා හොදි සමග කලවම් කරන්න.
7. සැකසූ කොත්තුව හොදි සමග උණුවෙන් පිළිගන්වන්න.
💡 නිවසේදී, ගෝදඹ රොටි නොමැති නම්, ඔබට ඉතිරි වූ පරාටා වැනි දෑ භාවිතා කළ හැකිය.
🌶️ කොත්තු වර්ග;
1. චිකන් කොත්තු
2. චීස් කොත්තු
3. බිත්තර කොත්තු
4. හරක් මස් හෝ එළුමස් කොත්තු
5. මුහුදු ආහාර කොත්තු – ඉස්සන්, දැල්ලන්, මාළු යොදා ගනී
6. ඉඳිආප්ප කොත්තු – රොටී වෙනුවට තැම්බූ ඉඳිආප්ප වලින් සාදා ඇත.
7. එළවලු කොත්තු
කොත්තුවේ සැඟවුණු මියුසික් ටේස්ට් එක;
කොත්තු පිළිබඳ වඩාත්ම කැපී පෙනෙන දෙයක් වන්නේ රසය පමණක් නොවේ. එය හොට්ප්ලේට් එක මත එහෙ මෙහෙ පතිත වන ස්පටුලස් ගැටෙන ශබ්දය සමඟ ඇතිවන සංගීතමය අත්දැකීමකි. වීදි වෙළෙන්දෝ එයින් සංදර්ශනයක් පවත්වති, පාරේ දෝංකාර දෙන තාලයට කොත්තු ගසති. රිද්මය ඇසීමෙන් පමණක් කොත්තුව සෑදෙන්නේ කොහෙද සහ කෙසේද යන්න ඕනෑම ශ්‍රී ලාංකිකයෙක්ට හඳුනාගත හැකි වීම ම විශේෂත්වයකි.
