කොළඹ LNW:සමගි ජන බලවේගයේ රත්නපුර දිස්ත්‍රික් පාර්ලිමේන්තු මන්ත්‍රී තලතා අතුකෝරල මහත්මිය අද (21) පාර්ලිමේන්තු මන්ත්‍රී ධුරයෙන් ඉවත්විය.
විශේෂ ප්‍රකාශයක් කරමින් ඇය පැවසුවේ තමන් පාර්ලිමේන්තු මන්ත්‍රී ධූරයෙන් මෙන්ම සමඟි ජන බලවේගය පක්ෂයෙන් ද ඉවත්වන බවයි.
2020 වන විට එක්සත් ජාතික පක්ෂයේ නායකත්වය වෙනස් විය යුතු බවට නිහඩ යෝජනාව සමගි ජන බලවේගය නිර්මාණය කරමින්කටයුතු කළ නමුත් අනාගතය ගැන නොසිතා ගත් එම තීන්දු නිසා දැවැන්ත පක්ෂයක් දෙකට වීමට අවස්ථාව සැලසුනු බවයි ඇය පැවසුවේ.
එක්සත් ජාතික පක්ෂය කඳවුරු දෙකකට බෙදී කටයුතු කිරීමට සිදුවීම තුළ තමාගේ හෘද සාක්ෂිය අනුව ක්‍රියා කිරීමේ දැඩි අපහසුතාවයකට පත් වූ බවද අතුකෝරල මහත්මිය කියා සිටියාය.
කෙසේ නමුත් පසුගිය කාලය පුරාම ඇය සමඟි ජන බලවේගය තුළද සක්‍රීයව දේශපාලන කටයුතුවල නොයෙදුණ අතර ඇය අවධාරණය කරමින් පැවතියේ මෙම කණ්ඩායම් දෙක නැවත එක්විය යුතු බවයි.
මේ අතර ඉදිරි ජානාධිපතිවරණය වෙනුවෙන් ඇය සිය පැරණි නායකයා වන රනිල් වික්‍රමසිංහ මහතා වෙත සහය දක්වනු ඇති බවද වාර්තා වෙයි.
2004 වසරේදී එක්සත් ජාතික පක්ෂයේ සහකාර නායකයකු වූ ගාමිණී අතුකෝරල මහතාගේ නැගණිය වන ඇය ගාමිණි අතුකෝරල මහතාගේ අභාවයෙන් පසුවයි දේශපාලනයට පිවිසියේ.
ආශිකා බ්‍රාහ්මණ
