කොළඹ LNW: ”අපිට එන සමහර පැමිණිලි ඇවිල්ලා අපිට රහස් කියල යන්න එනවා. අපිට රහස් කියල අනේ අපිව ගාව ගන්න එපා ඔයගොල්ලෝ ගිහින් දුෂණය මර්දනය කරන්න කියල. ඒකට අපි ලෑස්ති නෑ. මොකද අපිත් එක්ක එකට වැඩකරන්න ඕනේ. අපි ඔවුන් ආරක්ෂා කරන්න ලෑස්තියි” යනුවෙන් අල්ලස් හෝ දුෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල් හිටපු මහාධිකරණ විනිසුරු රංග දිසානායක මහතා පැවසුවේය.
වැරදි අකරණ තැනැත්තන්ට දඬුවම් කිරීමෙන් පමණක් අල්ලස දුෂණය පිටුදැකිය නොහැකි අතර ඊට එහා ගොස් සමස්ත සමාජයම දුෂණයට එරෙහිව දැනුවත් වී නැගී සිටිය යුතු බව දිසානායක මහතා ප්‍රකාශ කළේය.
”මෑතකදී එක නියෝජ්‍ය අමාත්‍යවරයෙක් කිව්වා, මම ඒ කතාවට ඉතාම කැමතියි. සිස්ටම් ජේන්ජ් කරන්න කියල කිව්වට සිස්ටම් එක තමන් ගාවට ආවහම වහලවල් උඩ නගිනවා කියල. මේක තමයි මාත් තේරුම්ගත්ත සත්‍ය. හැමෝම දුෂණ විරෝධී කියල කතා කළාට තමන් ගාවට ආවහම තමයි කියන්නේ තමන් හැර අනිත් දුෂණ විරෝධීන් අල්ලන්න කියල. ඒ නිසා අපි බැඳිලා ඉන්නවා අන්තර් ජාතික දුෂණ විරෝධී සම්මුතිය එක්ක. ඒ සම්මුතියේ තියෙන්නේ වැරදි කරන පුද්ගලයින් අල්ලලා දඬුවම් කිරීම පමණක් නොවෙයි. ඊට එහාට ගිහින් නිවාරණය සහ අධ්‍යාපනය තියෙනවා. ඒ නිසා ඇත්ත වශයෙන්ම අපි මොකක්ද කරන්න ඕනේ. අපි කරන්න ඕනේ මේ මුළු සමාජයේම මිනිස්සු දැනුවත් කරන්න ඕනේ දුෂණයට එරෙහිව නැගිටින්න. මේක අල්ලස් හෝ දුෂණ චෝදනා විමර්ශන කොමිෂන් සභාවේ හෝ ආණ්ඩුවේ වැඩක්වත් නෙවෙයි. මොකද මිනිස්සු හිතන් ඉන්නවා අපිට භාරදුන්නම හරි අපිට මුකුත් කරන්න දෙයක් නෑ කියල. එහෙම නෑ මේක රටේම මිනිසුන්ගේ වගකීමක් බව කියා දෙන්න අපිට ඕන වෙලා තියෙනවා. අපිට එන සමහර පැමිණිලි ඇවිල්ලා අපිට රහස් කියල යන්න එනවා. අපිට රහස් කියල අනේ අපිව ගාව ගන්න එපා ඔයගොල්ලෝ ගිහින් දුෂණය මර්දනය කරන්න කියල. ඒකට අපි ලෑස්ති නෑ. මොකද අපිත් එක්ක එකට වැඩකරන්න ඕනේ. අපි ඔවුන් ආරක්ෂා කරන්න ලෑස්තියි. අපි අදුනගෙන තියෙනවා පළාත් පාලන ආයතන සම්බන්ධයෙන් ගත්තම ඒවායේ විශාල වශයෙන් දුෂණ ක්‍රියාවන් සිද්ධ වෙනවා. මහජන තාව වද කරගන්න වැඩියෙන්ම යන්නේ පළාත් ආයතනවලට. ඒ පළාත් පාලන ආයතනවල නිලධාරීන් විශේෂයෙන්ම අපි හඳුනාගෙන තිබෙනවා වැඩකරලා දෙන්න පරක්කු කරනවා. අල්ලස් ගන්නවා. මේවා අපි හඳුනාගෙන තියෙන්නේ. පළාත් පාලන ආයතන මන්ත්‍රීවරු පත්වෙන්නේ මහජනතාවගේ ජන්දයෙන්. ඒ නිසා ඔබට වගකීමක් තියෙනවා පළාත් පාලන ආයතන දුෂණයෙන් තොර තැනක් කරන්න. සමහර වෙලාවට වෙන්නේ නිලධාරින් ඔබවත් නොමඟ යවනවා සහ ඔබ දන්නෙත් නෑ ඒවා සිද්ධ වෙනවා. ඒ නිසා අපි පියවරක් ගත්ත ඔබව දැනුවත් කරන්න. ඔබ ඔබගේ මහ නගර සභාව, නගර සභාව, ප්‍රාදේශීය සභාව සුද්ධ කරගන්න. ඒ සඳහා අපිට කරන්න පුළුවන් දේ අපි කරන්නම්. ඔබ දැනුවත් වෙන්න. ඔබ නවකයෙක් නම් මේ ආයතනවලට නිලධාරීන් ඔබේ නොදැනුවත්කම නිසා ඔබව නොමග යවන්න පුළුවන්.” යනුවෙන් අධ්‍යක්ෂ ජනරාල්වරයා වැඩිදුරටත් අවධාරණය කරයි.
රංග දිසානායක මහතා මෙම අදහස් පළකළේ ඊයේ (28) පළාත් පාලන ආයතන මන්ත්‍රීවරු දැනුවත් කිරීමේ වැඩසටහනකට එක්වෙමිනි.
ආශිකා බ්‍රාහ්මණ
