නිශ්මං රණසිංහ අගෝස්තු 29, කොළඹ LNW:
අගෝස්තු 24 සිට 30 දක්වා අහබදාබාද් හී ක්‍රියාතිමක වන පොදු රාජ්‍ය මණ්ඩලීය බර ඉසිලිමේ තරගාවලිය සඳහා ජ්‍යෙෂඨ,කණිෂ්ඨ සහ යොවුන් යන අංශ ත්‍රිත්වයම නියෝජනය කරමින් සහභාගි වන ක්‍රීඩක කණ්ඩායම මේ වන විට රිදී පදක්කම් 4 ක් සහ ලෝකඩ පදක්කම් 5 ක් දිනා ගන්නට සමත් වී සිටිනවා.
රිදි පදක්කම් හතරටම හිමිකම් කියන්නේ පිරිමි ක්‍රීඩකයින් වන අතර එක් රිදී පදක්කමක් පිරිමි අංශයෙන් ද, රිදී පදක්කම් දෙකක් මතු බලාපොරොත්තු අවුලුවාලමින් පිරිමි යොවුන් අංශයෙන්ද ,එක් රිදී පදක්කමක් කණිෂ්ඨ අංශයෙන් ද හිමිව තිබෙනවා.කිලෝ ග්‍රෑම් 56 බර පංතියෙන් තරග වැදුණු හිමාෂ් තරුෂ එහි රිදී පදක්කම දිනා දෙන්නට සමත් වුණා. වෙනුර කාරියවසම් කිලෝ ග්‍රෑම් 65 බර පංතියේ යොවුන් අංශයේ රිදී පදක්කම දිනා ගනිද්දී,එම බර කාණ්ඩයේම කණිෂ්ඨ අංශයේ රිදී පදක්කම අනොෂ් අශේන් දිනා ගැනීමට සමත් වුණා.ශ්‍රී ලංකාවේ සිව්වන රිදී පදක්කම කිලෝ ග්‍රෑම් 71 බර පංතියේ යොවුන් කාණ්ඩයෙන් ශ්‍රී ලංකාවට දිනා දෙන්නට ඩිල්ම නිමේෂ සමත් වුණා.
කිලෝ ග්‍රෑම් 60 පංතියෙන් තරග වැදුණ ඩිල්ෂාන් ඉසුරු කුමාර එහි ලෝකඩ පදක්කම ශ්‍රී ලංකාවට හිමි කර දුන් අතර කාන්තා අංශයෙන් කිලෝ ග්‍රෑම් 44 බර පංතිය නියෝජනය කරමින් තරග පිටියට පිවිසි යශිනි චමෝධ්‍යා ද ලෝකඩ පදක්කමකට හිමි කියන්නට සමත් වුණා.කාන්තා කණිෂ්ඨ අංශයෙන් සචිනි ලක්ෂාණි කිලෝග්‍රෑම් 53 බර පංතියෙන් ලෝකඩ පදක්කම දිනා ගත් අතර කාන්තා යොවුන් තරග අංශයෙන් තරග වැදුණු හිරුණි ජොඇනි ඩයස් කිලෝ ග්‍රෑම් 68 බර පංතියෙන් ලෝකඩ පදක්කම දිනා ගනු ලැබුවා.යොවුන් අංශයෙන් ඩිල්ම නිමේෂ රිදී පදක්කම දිනා ගත් කිලෝ ග්‍රෑම් 71 බර පංතියේ ලෝකඩ පදක්කමද ශ්‍රී ලංකාවට හිමි වුණ අතර එයට හිමිකම් කීවේ ඕධිත තරුපතියි.
එසේම 2010,2014.2018,2022 පොදු රාජ්‍ය මණ්ඩලීය තරගාවලිය නියෝජනය කළ ඉන්දික දිසානායකද කිලෝ ග්‍රෑම් 71 බර පංතියෙන් සිව්වන තැන ලබමින් 2026 පොදු රාජ්‍ය මණ්ඩලීය ක්‍රීඩා උළෙල නියෝජනයට ද සුදුසුකම් ලබා ගනු ලැබුවා.ඡායාරූපයේ දැක්වෙන්නේ ශ්‍රී ලංකාවට ලෝකඩ පදක්කමක් ලබා දුන් ඩිල්ෂාන් ඉසුරු කුමාරයි.
