කොළඹ LNW: විපක්ෂයේ පක්ෂ කිහිපයක සහභාගීත්වයෙන් අද (29) දින විපක්ෂ නායක කාර්යාලයේ සාකච්ජාවක් පැවැත්විය.
හිටපු ජනාධිපති රනිල් වික්‍රමසිංහ මහතා අත්අඩංගුවට ගෙන රක්ෂිත බන්ධනාගාරගත කිරීමෙන් අනතුරුව විපක්ෂයේ දේශපාලන පක්ෂ අතර ඇතිකර තිබෙන එකඟතාවන්හි දිගුවක් ලෙසයි එම සාකච්ජාව පවත්වා ඇත්තේ.
ඒ අනුව එම සාකච්ජාව විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් සාකච්ඡාවක් පැවැත්විය.
මෙම සාකච්ඡාව සඳහා සමගි ජන බලවේගය, එක්සත් ජාතික පක්ෂය, ශ්‍රී ලංකා නිදහස් පක්ෂය, එක්සත් ජනතා නිදහස් සන්ධානය ඇතුළු දේශපාලන පක්ෂ එක්වී සිටි අතර ඊට ශ්‍රී ලංකා පොදුජන පෙරමුණ සහභාගී වී නැත.
රනිල් වික්‍රමසිංහ මහතාට ඇප ලබාදුන් දිනයේදී උසාවිය ඉදිරිපිට උද්ඝෝෂණ සිදුකළ පාක්ෂිකයන් අත්අඩංගුවට ගැනීමට අධිකරණයෙන් සිදුකළ නියෝගය සම්බන්ධයෙන් අද සාකච්ජාවේදී අවධානයට ලක්ව ඇති අතර අවශ්‍ය වුවහොත් නීතිඥ සහාය ලබාදීම සඳහා අවශ්‍ය ක්‍රියාමාර්ග ගැනීමටද අවධානය යොමුකර ඇති බව සඳහන්.
කෙසේවෙතත් මෙම සාකච්ජා හරහා සන්ධානයක් ගොඩනැගීමට අපේක්ෂා නොකරන අතර ආණ්ඩුවේ මර්දනයට එරෙහිව එකතුවීමක් මෙන්ම එම මර්දනය ගැන ජනතාව දැනුවත් කිරීම පමණක් අපේක්ෂා කරන බව ඊට එක්ව සිටි හිටපු අමාත්‍යවරයෙක් වන දුමින්ද දිසානායක මහතා පවසා තිබුණි.
මෙම සාකච්ජාව ආණ්ඩුවට එරෙහිව නැගිටීමක් නොවන බව පාර්ලිමේන්තු මන්ත්‍රී රාමනාදන් රාර්ජුනා මහතා පැවසීය.
එමෙන්ම එක්සත් ජාතික පක්ෂය සහ සමගි ජන බලවේගය අතර ඉදිරියේදී පැවැත්වීමට නියමිත සාකච්ඡා පිළිබඳවත් පොදු විපක්ෂයක් ලෙස ක්‍රියා කළ යුතු ආකාරය සම්බන්ධයෙනුත් මෙම සාකච්ජාවේදී අවධානය යොමුකර ඇත.
මේ අතර ආණ්ඩුව ගෙනයන විපක්ෂයට එරෙහි මර්දනය පිළිබඳ ඉදිරියේදී ජනතාව දැනුවත් කිරීම සඳහා සියලු පක්ෂවල සහභාගීත්වයෙන් කමිටු පත් කිරීමට ද යෝජනා වී තිබේ.
ආශිකා බ්‍රාහ්මණ
