නිශ්මං රණසිංහ අගෝස්තු 30, කොළඹ LNW:
කොළඹ උතුර සහ දකුණ කණ්ඩායම් අතර පැවත්වුණ,ශ්‍රී ලංකා ක්‍රිකට් මෙහෙයවන ලද,අවුරුදු 17 න් පහළ යූත් ලීග් තරගාවලියේ සූරයන් වන්නට කොළඹ උතුර කණ්ඩායමට හැකි වුණා.අඩු ලකුණු වාර්තා වූ තරගයේදී පළමුව පන්දුවට පහර දුන් උථුර කණ්ඩායම ලකුණු 164 ට සීමා කරන්නට කොළඹ දකුණ පන්දු යවන්නන් සමත් වුව ද,කොළඹ උතුර පන්දු යවන්නන් එම ලකුණු ප්‍රමාණය ආරක්ෂා කර දී කොළඹ දකුණ කණ්ඩායම ලකුණු 133 ට දවා ගැනීමට සමත් වූයේ ඩක්වර්ත් ලුවිස් න්‍යාය යටතේ ලකුණු 33 ක ජයක් කොළඹ උතුර කණ්ඩායමට ලබා දීමට මුල් වෙමින්.
මේ තරගාවලියේ වර්ෂාව විසින් ඇති කළ පීඩනය නිසා ද ඇතැම් අවස්ථාවල අවුරුදු 17 න් පහළ වැනි ක්‍රීඩකයන්ට පසුව පන්දුවට පහර දීමේදි පැවරෙන ලකුණු ඉලක්කයට සැළසුම් සහිතව පිවිසෙන්නට නොහැකි වීමෙන් තරගාවලියේ හැඩය යම් තරමකට වෙනස් වුණා.ලකුණු 164 ක ඉලක්කය වෙනුවට ඩක්වර්ත් ලුවිස් හඹා යාමේ සිද්ධාන්තය විසින් පවරන ලද ලකුණු 167 ක් සැපිරීම කොළඹ දකුණ සියල්ලම දැවී යන අවස්ථාව වූ 27 වන පන්දු ඕවරයේදී පැවරී තිබුණා.එය කොළඹ උතුර කණ්ඩායම රැස් කළ මුළු ලකුණු ප්‍රමාණය වූ ලකුණු 164 ටත් වඩා ලකුණු 3 ක වැඩිවීමක් වීමත් සැළකිය යුතුයි.
කොළඹ උතුර ඛණ්ඩායම ලකුණු 164 ට සීමා කරන්නට කොළඹ දකුණ කණ්ඩායමේ රුසඳු සිල්වා පෙරමුණ ගනු ලැබුවා.ඔහු ලකුණු 16 ක් පමණක් ලබා දී කඩුලු 4 ක් දවා ගනු ලැබුවේ පන්දු ඕවර් 7 ක් යවමින්.රුසඳු සහ දකුණ පන්දු යවන්නන් ඇති කරන ලද පීඩනය හමුවේ ඉවසිලිවන්ත ඉණිමක් ක්‍රීඩා කළ සන්තුල් විජේරත්න ලකුණු 59 ක් ලබා ගනිමින් කැපී පෙණුන ඉණිමක් දියත් කළා.
පිළිතුරු ඉණිම තුළ පෙරට පැමිණි ඩක්වර්ත් ලුවිස් න්‍යාය යටතේ වේගවත් හඹා යාමකට උත්සාහ කළ කොළඹ දකුණු පිතිකරුවන් සිව් දෙනෙකු පහර දෙන්නට පොළඹවමින් ලකුණු 37 ට කඩුලු 4 ක් දවා ගැනීමට මුල් වූ මිනුඟ නෙත්සර කොළඹ උතුර කණ්ඩායම වෙනුවෙන් දකුණේ පිතිකරුවන් මුලා කිරීමේ කාර්යයට ප්‍රධාන වශයෙන් බලපෑවා.නායක රෙහාන් පීරිස් (37) සහ සීමන් අනුහස් (28) එක්ව දෙවන කඩුල්ල වෙනුවෙන් ලකුණු 59 ක සබඳතාවයක් ඇති කරමින් කොළඹ දකුණ තරගයට අවතීර්ණ කිරීමට ගත් උත්සාහය සෙසු පිතිකරුවන්ගේ නොසැළකිල්ල නිසා කොළඹ දකුණ කණ්ඩායමට අහිමි වුණා.
