රෂිකා හෙන්නායක අගෝස්තු 31, කොළඹ LNW:
අද (31) පෙරවරුවේ වෙන්නප්පුව පොලීසිය ආසන්නයේ පිහිටි වැව පාර ප්‍රදේශයේදී වෙඩි තැබීමක් සිදුව ඇති අතර, මොටර් රථයකින් පැමිණි පිරිසක් විසින් යතුරුපැදියේ ගමන් ගත් පුද්ගලයෙකු අනතුරකට ලක් කර පසුව යතුරුපැදියේ පැමිණි දෙදෙනාට තියුණු ආයුධයකින් පහරදී වෙඩි තබා ඇති බව වාර්තා වේ.
මෙම සිද්ධියෙන් යතුරුපැදියේ පැමිණි එක් අයෙකු තුවාල ලබා පළා ගොස් ඇති අතර අනෙක් පුද්ගලයා වෙඩි වැදීමෙන් ජීවිතක්ෂයට පත්ව ඇති අතර, යතුරුපදියෙන් පැමිණි දෙදෙනාගෙන් මිය ගිය තැනැත්තා මහාධිකරණයේ පවතින නඩුවකට අදාළව වෙන්නප්පුව පොලීසියේ අත්සන් කිරීමට පැමිණ ආපසු යමින් සිටි අවස්ථාවේදී මෙම වෙඩි තැබීම සිදුව ඇති බව පැවසේ.
මෙම වෙඩි තැබීම , රිවොල්වර වර්ගයේ ගිනි අවියකින් සිදුකර ඇති බවද පොලීසිය පවසන අතර, මිය ගිය පුද්ගලයාගේ නඩුව සම්බන්ධව අධිකරණ තීන්දුව ලැබීමට 2025 සැප්තැම්බර් මස 09 වැනි දිනදී නියමිතව තිබූ බවද පොලීසිය වැඩිදුරටත් කියා සිටී.
