රෂිකා හෙන්නායක අගෝස්තු 31 , කොළඹ LNW :
යාපනය, වඩමාරච්චි නිරිතදිග ප්‍රාදේශීය සභාවේ ජාතික ජන බලවේග (NPP) මන්ත්‍රීවරයෙකු වන චන්ද්‍රකුමාර් ගනේසරුබන්, පෞද්ගලික නිවසකට අනවසරයෙන් ඇතුළු වී පහරදීමක් සිදු කළ බවට එල්ල වූ චෝදනා මත අත්අඩංගුවට ගැනීමෙන් අනතුරුව, සිය ප්‍රාදේශීය සභා මන්ත්‍රී ධුරයෙන් ඉල්ලා අස්වී තිබේ.
නෙල්ලිඅඩි ප්‍රදේශයේ පිහිටි විශ්‍රාමික රජයේ නිලධාරියෙකුගේ නිවසකට ගල් ප්‍රහාරයක් එල්ල කරමින් පහරදීමක් සිදු කිරීම සහ එම පරිශ්‍රයේ සවිකර තිබූ ආරක්ෂක කැමරාවලට හානි කිරීම සම්බන්ධයෙන් මෙම ජාතික ජන බලවේග ප්‍රාදේශීය සභා මන්ත්‍රීවරයා ඇතුළු පිරිසක් චෝදනා ලබා සිටියහ.
නිවසේ පදිංචිකරුවන් විසින් සිද්ධිය පිළිබඳව පොලිසියට පැමිණිලි කිරීමෙන් අනතුරුව අදාළ පිරිස අත්අඩංගුවට ගැනිණි.
පොලිස් ස්ථානය වෙත රැගෙන ගිය එම පුද්ගලයින්ගෙන් ප්‍රශ්න කිරීමෙන් අනතුරුව ඔවුන් පොලිස් ඇප මත මුදා හැර තිබුණි. මේ අතර, අදාළ ජාතික ජන බලවේග ප්‍රාදේශීය සභා මන්ත්‍රීවරයා සිය ප්‍රාදේශීය සභා මන්ත්‍රී ධුරයෙන් ඉල්ලා අස්වී ඇත.
