සටහන – රෂිකා හෙන්නායක
කොළඹ (LNW): විදුලිබල මණ්ඩලයේ ප්‍රතිව්‍යුහගත කිරීමේ වැඩපිළිවෙල සම්බන්ධයෙන් මේ දිනවල මානව සම්පත් විගණනයක් සිදුවන බවත් , එම විදුලි මණ්ඩලය ප්‍රතිව්‍යුහගත කිරීමේ වැඩපිළිවෙල මඟින් කිසිදු සේවකයෙකුගේ රැකියා අහිමිවීමක් සිදුනොකරන බවත් විදුලිබල හා බලශක්ති අමාත්‍ය කංචන විජේසේකර මහතා පවසයි.
කංචන විජේසේකර අමාත්‍යවරයා පවසන්නේ, එම විගණනයෙන් අනතුරුව ස්ථිර සේවයට අන්තර්ග්‍රහණය කිරීම සහ ස්ථානගත කිරීම සිදුකරන බවත් ඉදිරියේ දී ලබාදෙන දීමනා මෙන්ම උසස්වීම් කාර්ය සාධනය මත පමණත් සිදුකිරීමට ද පියවර ගන්නා බවයි.
විදුලිබල මණ්ඩලයේ ස්ථිර සේවයට අන්තර්ග්‍රහණයවීමට වසර 07ක සිට බලාපොරොත්තුවෙන් සිටින තාවකාලික පදනමින් සේවය කරන පිරිසේ නියෝජිතයින් හමුවෙමින් අමාත්‍යවරයා මෙසේ ප්‍රකාශ කර ඇත.
කංචන විජේසේකර මහතා වැඩිදුරටත් පවසන්නේ, විවිධ වෘත්තීය සමිති විසින් තම දේශපාලන අවශ්‍යතා මත නිර්මාණය කර ඇති අදහස් හේතුවෙන් මෙම ස්ථිර නොවන සේවකයින් තුළ විදුලිබල මණ්ඩලයේ ප්‍රතිව්‍යුහගත කිරීමේ වැඩසටහන ගැන අනවබෝධයක් නිර්මාණය වී ඇති බවයි.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
