සටහන – රුවන් නෙළුගොල්ල
රනිල් වික්‍රමසිංහ සහ අනුර කුමාර දිසානායක අලුත් දේශපාලන දීගයක් කන බවත් මේ දෙන්නටම රට ගොඩගන්න වුවමනා නොමැති බවත් එක් අයකුට ජන හද ගැස්ම නොතේරෙන බවත් ලක්ෂ 220න් ජනතාවගේ සිතුම් පැතුම්, දුක වේදනාව නොතේරෙන බවත් අනික් පුද්ගලයා විනාශ කිරීම, ගිනිබත් කිරීම, සමූල ඝාතනය ප්‍රමුඛ කර ගෙන ඇති බවත් ඇගලුම් කම්හල් 200 වැඩපිළිවෙළ සකස් කරන විට තුන්ඩු නිකුත් කර ප්‍රේමදාස හදන ඇගලුම් කම්හල් ගිනි තියන බවට තර්ජනය නිකුත් කළ බවත් විපක්ෂ නායක සජිත් ප්‍රේමදාස මහතා පවසයි.
මේ රට රාජපක්ෂලා විනාශ කරමින් රට තුළ අහේනියක් ඇති කර අවසන් බවත් පුච්චන අයට ගිනිබත් කරන අයට මිනිමරන අයට තවදුරටත් මේ රට ගොඩගත නොහැකි බවත් රනිල් වික්‍රමසිංහට සහ අනුර කුමාර දිසානායකට ඇත්තේ සමගි ජන බලවේගය බලයට විත් වැඩක් කරයි කියා බියක් බවත් විපක්ෂ නායක සජිත් ප්‍රේමදාස මහතා සඳහන් කළේය.
මේ මැතිවරණයේ බෙදුම් රේඛාව පැහැදිලි බවත් රටේ ලක්ෂ 220 ජනතාව රනිල් වික්‍රමසිංහ – අනුර කුමාර දිසානායක දේශපාලන හවුල අවබෝධ කර ගෙන ඇති බවත් මේ දෙන්නගේම අරමුණ සජිත් ප්‍රේමදාස පරාජය කිරීම බවත් පැවසූ විපක්ෂ නායකවරයා ඔවුන්ගේ අරමුණ එය වුවත් තමාගේ සහ සමගි ජන බලවේගයේ හා සමගි ජන සන්ධානයේ පොදු අරමුණ වන්නේ කඩා වැටුණු රට මේ මහා ඛේදවාචකයෙන් ගොඩ ගෙන සංවර්ධනයේ සෞභාග්‍යයේ හෙට දවස රටේ ලක්ෂ 220 ජනතාවට උදාකරලීම බවත් අවධාරණය කළේය.
76 වසරක ඉතිහාසය පුරා රටට වැඩක් කළේ රාජ්‍ය බලය උපයෝගී කර ගෙන බදු අරමුදලින් වුවත් සමගි ජන බලවේගය විපක්ෂයේ සිට පසුගිය වසර 4ක කාලය තුළ රුපියල් බිලියනයකට ආසන්න අගයක් සෞඛ්‍ය හා අධ්‍යාපනය වෙනුවෙන් වෙන් කළ බවත් මේ රටේ ජනතාව දුකින් මුදවා ගැනීමට හැකි සමගි ජන බලවේගයට බවත් දුෂණය වංචාව හොරකම පිටුදැක හොරු අල්ලා හොරු රටෙන් හොරා කෑ මුදල් නැවත ලබා ගැනිමට කටයුතු කරන බවත් විපක්ෂ නායකවරයා මෙහි දී පැවසීය.
සෑම ගනුදෙනුවක්ම ඩිජිටල් වේදිකාවක් හරහා සියලු දෙනාටම දැන ගැනීමට සලසන බවත් සෑම රාජ්‍ය වියදමක් ගැනම තොරතුරු දැන ගැනීමට අයිතිය ලබා දෙන බවත් ටෙන්ඩර් ක්‍රමවේදයෙන් බැහැරව කටයුතු නොකරන බවත් ජනාධිපතිවරයා හෝ අගමැතිවරයා හෝ මැතිඇමතිවරුන්ගේ හිතුමතේට යාලු හිතවත්කම් මත ටෙන්ඩර් ලබා දීම ආයතනවලට වාසි වන ලෙස සකස් කිරීමට ඉඩ නොතබන බවත් දූෂණය පිටුදකින ස්වර්ණමය යුගය නිර්මාණය කරන බවත් විපක්ෂ නායකවරයා තවදුරටත් ප්‍රකාශ කළේය.
බරපතල ඛේදවාචකයකට ලක්ව ඇති මොහොතක ජනතාවගේ ජන ජීවිත අඩාල වී ඇති මොහොතක සුපිරිසුදු පාලනයක් තුළ ලක්ෂ 220ක් වූ පොදු ජනතාවට වගකියන වගවෙන විනිවිදභාවයෙන් යුක්ත පොදුජන කේන්ද්‍රිය රාජ්‍ය පාලනයක් තුළ මේ රට ගොඩගන්නා බවත් විපක්ෂ නායකවරයා පැවසීය.
විපක්ෂ නායක සජිත් ප්‍රේමදාස මහතා මේ බව පැවසුවේ හෝමාගමදී පැවති ජන රැලියක් අමතමිනි.
