ශ්‍රී ලංකා පොදුජන පෙරමුණේ නායක, හිටපු ජනාධිපති මහින්ද රාජපක්ෂ මහතා හෙට (11) දිනයේදී විජේරාම නිල නිවසෙන් ඉවත්ව තංගල්ලේ පිහිටි තම නිවස කරා යාමට නියමිත බව ආරංචිමාර්ග පවසයි.
ඒ, හිටපු ජනාධිපතිවරුන්ගේ හිමිකම් අහෝසි කිරීමේ පනත් කෙටුම්පත අද පස්වරුවේ පාර්ලිමේන්තුවේදී වැඩි ඡන්ද 150කින් සම්මත වූ තත්වය යටතේ ය. හිටපු ජනාධිපතිවරුන්ට ලබාදී තිබිණු නිල නිවාස ඇතුළු වරප්‍රසාද ප්‍රමාණයක් ඉවත් කිරීම සඳහා මෙම පනත් කෙටුම්පත සකස් කර තිබිණි.
ඒ අනුව, හෙට පෙරවරුවේ මහින්ද රාජපක්ෂ මහතා විජේරාම නිල නිවසේදී විදේශ තානාපතිවරුන් කිහිපදෙනෙකු හමුවීමට නියමිත බව සඳහන්.
ඉන් අනතුරුව දහවල් 12.00 – 01.00 පමණ වන විට ඒ මහතා විජේරාම නිල නිවසින් තංගල්ල බලා පිටත්වීමට නියමිත බවත් ඒ මහතා තංගල්ලට පැමිණෙන විට පිළිගැනීම සඳහා විශාල පිරිසක් එහි රැස්වීමට නියමිත අතර ඊට අදාළ කටයුතුත් මේ වනවිට සිදුවෙමින් පවතින බවත් ආරංචිමාර්ග වැඩිදුරටත් ප්‍රකාශ කළේය.
