අශෝක ජයතුංග
සැප්තැම්බර් 20 වොෂින්ටන් LNW :
“ශ්‍රී ලංකා දිනය 2024” වොෂින්ටනයේ දී මහ ඉහළින්.
ඇමෙරිකාවේ “ශ්‍රී ලංකා එසෝෂියේෂන් ඔfප් වොෂින්ටන් DC” සංවිධානය වාර්ෂිකව පවත්වන “ශ්‍රී ලංකා දිනය 2024” මෙවරද ලාංකිකයන් විශාල පිරිසකගේ සහභාගීත්වයෙන් මේරිලන්ඩ් සිල්වර්ස්ප්‍රින් හිදී පැවැත්වින.
1961 අරඔා ඇති මෙම සංවිධානය ඇමෙරිකාවේ පැරණිතම ලාංකීය සංවිධානය වේ. වොෂින්ටන් තානාපති නිළ බලයෙන් එහි ප්‍රධාන අනුශාසක වන අතර වත්මන් සභාපති නුවන් ධර්මබන්දු, ලේකම් මනෝරි ද සිල්වා, උපසභාපති කාවින්දි වීරවත්ත, භාණ්ඩාගාරිකයන් වන හලීමා නූර් හා චමිල් පෙරේරා මහත්ම මහත්මීන් ඇතුළු සාමාජික පිරිස උත්සවය සංවිධානය කළහ.
මේරිලන්ඩ් නියෝජ්‍ය ආණ්ඩුකාර අරුණා මිලර් හිටපු කොංග්‍රස් සභික ජෝන් ඩිලේනි හා ලබන නොවැම්බරයේදී කොංග්‍රස් මණ්ඩලයට මෙිරිලන්ඩ් ප්‍රාන්තයට ඩිමොක්‍රටික් පක්ෂයෙන් තරග කරන ඒප්‍රිල් ඩිලේනි හා තානාපති මහින්ද සමරසිංහ මහත්ම මහත්මීන් ප්‍රධාන ආරාධිතයින් ලෙස ඊට එක්වූහ.
පිරිමි හා කාන්තා ක්‍රිකට්, දැල් පන්දු, ධාවන තරග හා සියලු ජාතීන්ට අයත් සංස්කෘතිකාංග ඇදුම් පැළදුම් ඉදිරිපත් කෙරිණ. ඉන්දික අත්තනායක ගේ “සිලෝන් බෙර” චතුරි වික්‍රමාරච්ච් ගේ “නටමු ස්කුල් ඔfප් ඩාන්ස්” හා වරුණි ගුණතිලකගේ “ලංකා ඩාන්සිං ඇකඩමිය” විසින් ඉසව් රැසක් ඉදිරිපත් කෙරින.
සීත සෘතුවේ ආබාධ වළකන එන්නත හා ඇස් පරීක්ෂාවෙකින් පසු නොමිලේ කණ්නාඩි සැපයින. කොළකැඳ හා ලාංකීය ආහාර පාන ඇදුම් ආයිත්තම් වලින් පිරිණු වෙළෙඳ කුටි රැසක් ද විවෘතව තිබිණ. තානාපති කාර්යාලය විසින් සියලු දෙනාට ලංකා තේ වලින් නොමිලේ සංග්‍රහ කෙරිණ.ලංකාවේ ඈත පාසල් වලට පොත් හා පාසල් උපකරණ ලබා දීම හා ලංකාවට නොමලේ ඇස් කණ්නාඩි ලබාදීම අඛණ්ඩව පවත්වාගෙන යන බවද “ශ්‍රී ලංකා එසෝෂියේෂන් ඔfප් වොෂින්ටන් DC” සංවිධානය එහිදී අවධාරණය කළේය.
