රෂිකා හෙන්නායක සැප්තැම්බර් 21, කොළඹ (LNW):
ගෙවී ගිය් වසර 2022දී බංකොලොත්භාවයකට පත්වූ ශ්‍රී ලංකාව මේ වන විට වසර දෙකහමාරක් වැනි කෙටි කාලයක් තුළ ණය ප්‍රතිව්‍යුහගතකරණය කොට අද වන විට බංකොලොත්භාවයෙන් මිදීම ආර්ථික වශයෙන් බිඳවැටුණු රාජ්‍යයන් ගොඩ ඒමට ආදර්ශයක් කර ගත යුතු ලෝක තත්ත්වයකැයි මුදල් අමාත්‍යාංශයේ හිටපු ලේකම් ආචාර්ය ආර්.එච්.එස්. සමරතුංග මහතා ප්‍රකාශ කළේය.
මේ වන විට, එක්සත් ජනපද ඩොලර් බිලියන 84ක ණය කන්දක් ආපසු ගෙවීම සඳහා තුන් ආකාරයකට ණය ප්‍රතිව්‍යුහගතකරණය කිරීමට ආණ්ඩුව සමත් වී ඇති බවත්, ඒ අනුව එක්සත් ජනපද ඩොලර් බිලියන 17.5ක ණය ප්‍රමාණයක් ප්‍රතිව්‍යුහගතකරණය කොට සහන ලබා ගැනීමට ශ්‍රී ලංකාව සමත්වී ඇතැයි ද ඔහු කීය.
ඊට අමතරව කවුරු රට පාලනය කළ ද ශ්‍රී ලංකාව නැවත ආර්ථික වශයෙන් බංකොලොත්භාවයට පත් නොවන තැනට කටයුතු කිරීමට අදාළ අණ පනත් පහක් මේ වන විට ආණ්ඩුව සම්මතකොට ගෙන තිබෙන බව ද හිටපු ලේකම්වරයා අවධාරණය කළේය.
හිතුමතේට මුදල් මුද්‍රණය කිරීමට වැට බඳින ආකාරයට ශ්‍රී ලංකා මහ බැංකු පනත ගෙනැවිත් තිබේ. හිතුමතේට ජනතා මුදල් දේශපාලන වුවමනාකම් මත වියදම් කිරීම ඇහිරීමට රාජ්‍ය මූල්‍ය වගකීම් කළමනාකරණ පනත ගෙනැවිත් තිබේ. රජයට ණය පහසුකම් ලබා ගැනීමේදී දැඩි විනයක් ඇතිව කටයුතු කිරීමට මඟපාදන රාජ්‍ය ණය කළමනාකරණ පනත ගෙනැවිත් තිබේ. ශ්‍රී ලංකා ආර්ථිකය වේගයෙන් දියුණු කිරීම සඳහා ආර්ථික පරිවර්තන පනත හඳුන්වාදී ඇති බවද ඔහු පවසයි.
දූෂණය සහ අල්ලස වැළැක්වීමට ජාතික දූෂණ විරෝධී පනත සම්මත කොට ඇති බවත්, මේ ප්‍රධාන පනත් පහ ඇතුළු අනෙකුත් නීති ප්‍රතිසංස්කරණ සහ ආර්ථික ප්‍රතිසංස්කරණ ගැනීමට ගතවූ දෙවසරක පාලනය කාලය තුළ සිදුවූ සුවිශේෂී කාර්ය බව ද හිටපු ලේකම්වරයා පැහැදිලි කර සිටී.
