රෂිකා හෙන්නායක සැප්තැම්බර් 24, කොළඹ LNW :
පොලිස් නිෂ්කාශන සහතික (Police Clearance Certificates) සඳහා වන අයදුම්පත් සම්බන්ධ විමසීම් සඳහා නව WhatsApp අංකයක් හඳුන්වා දී ඇත.
071 8595950 යන අංකයට WhatsApp පණිවිඩයක් යොමු කිරීම මගින් මේ පිළිබඳ විමසීම් සිදු කළ හැකි බව පොලිස් නිෂ්කාශන අංශය (Police Clearance Division) නිවේදනය කළේය.
වර්තමානයේදී, ප්රාදේශීය පොලිස් ස්ථාන හරහා පොලිස් නිෂ්කාශන වාර්තා ලබා ගැනීමේ පහසුකම අයදුම්කරුවන්ට සලසා දී ඇත.
පොලිස් නිෂ්කාශන පරිගණක පද්ධතියේ සිදු කෙරෙන අත්යවශ්ය නඩත්තු කටයුතු හේතුවෙන්, පොලිස් නිෂ්කාශන අයදුම්පත් මාර්ගගතව (online) ඉදිරිපත් කිරීම තාවකාලිකව අත්හිටුවා ඇති බව පොලිසිය පැවසීය.
පද්ධතිය සම්පූර්ණයෙන්ම යථා තත්ත්වයට පත් වන තුරු, මෙම විකල්ප ක්රමවේදය ඔස්සේ පොලිස් නිෂ්කාශන සහතික සඳහා වන කටයුතු සිදු කෙරෙනු ඇත.
ඒ අනුව, අයදුම්කරුවන්ට පොලිසියේ නිල වෙබ් අඩවිය වන www.police.lk වෙත පිවිස, ‘Digital Services’ (ඩිජිටල් සේවා) කොටසට ගොස්, ‘Clearance Certificate’ (නිෂ්කාශන සහතිකය) තෝරාගෙන අදාළ අයදුම්පත බාගත කරගත හැකිය.
පිරවූ අයදුම්පත, අයදුම්කරුගේ ජාතික හැඳුනුම්පත, විදේශ ගමන් බලපත්රය සහ උප්පැන්න සහතිකය යන ලේඛනවල පිටපත් සමඟ පොලිස් ස්ථානයක් වෙත ඉදිරිපත් කළ යුතුය. ජාතික හැඳුනුම්පතේ සහ විදේශ ගමන් බලපත්රයේ සඳහන් නම් අතර යම් වෙනසක් හෝ නොගැලපීමක් පවතී නම්, දිවුරුම් ප්රකාශයක පිටපතක් ද ඒ සමඟ ඉදිරිපත් කළ යුතුව ඇත.
මේ වන විට විදේශයන්හි පදිංචිව සිටින අයදුම්කරුවන්, අදාළ ලේඛන තම සමීපතම ඥාතියෙකු මාර්ගයෙන් අදාළ පොලිස් ස්ථානයට ඉදිරිපත් කිරීමට කටයුතු කළ යුතුය.
ශ්රී ලංකා පොලිස් නිෂ්කාශන සහතිකයක් ලබා ගැනීමට අපේක්ෂා කරන විදේශීය ජාතිකයින්ට, තමන් පදිංචි රටේ පිහිටි ළඟම ඇති ශ්රී ලංකා තානාපති කාර්යාලය හෝ මහ කොමසාරිස් කාර්යාලය හරහා තම අයදුම්පත් ඉදිරිපත් කළ හැකිය.
පොලිස් නිෂ්කාශන පරිගණක පද්ධතිය සම්පූර්ණයෙන්ම යථා තත්ත්වයට පත් වන තුරු මෙම තාවකාලික ක්රියාපටිපාටිය ක්රියාත්මක වන බව පොලිසිය සඳහන් කළේය.
