සටහන – රුවන් නෙළුගොල්ල
එක්සත් ජාතීන්ගේ මහා මණ්ඩලයේ 80 වන සැසිවාරයට සහභාගි වීම සඳහා නිව්යෝර්ක් නුවරට පැමිණි ජනාධිපති අනුර කුමාර දිසානායක මහතා සහ එක්සත් ජාතීන්ගේ මහ ලේකම් අන්තෝනියෝ ගුටේරෙස් (António Guterres) මහතා අතර හමුවක් නිව්යෝර්ක් නුවර එක්සත් ජාතීන්ගේ මූලස්ථානයේදී ඊයේ (25) පස්වරුවේ පැවැත්වී තිබේ.
එක්සත් ජාතීන්ගේ මූලස්ථානය වෙත පැමිණි ජනාධිපතිවරයාව, එක්සත් ජාතීන්ගේ මහලේකම්වරයා විසින් ගෞරවයෙන් යුතුව පිළිගනු ලැබූ අතර, අනතුරුව ඔවුන් සුහද කතාබහකට එක්වූ බවයි ජනාධිපති මාධ්ය ඒකකය පවසන්නේ.
ශ්රී ලංකාවේ නව ආර්ථික ප්රතිසංස්කරණ සහ ණය ප්රතිව්යුහගත කිරීමේ ක්රියාවලියේ ප්රගතිය මෙන්ම ආර්ථික, සමාජයීය සහ දේශපාලනමය වශයෙන් ශ්රී ලංකාව නව තලයකට ඔසවා තැබීම වෙනුවෙන් මේ වන විට රජය ක්රියාත්මක කර ඇති වැඩපිළිවෙළ පිළිබඳව ජනාධිපතිවරයා මෙහිදී එක්සත් ජාතීන්ගේ මහ ලේකම්වරයා දැනුවත් කර ඇත.
ශ්රී ලංකා රජයේ නව ප්රගතිශීලි වැඩපිළිවෙළ මෙහිදී අගය කළ මහ ලේකම්වරයා, ඒ වෙනුවෙන් එක්සත් ජාතීන්ගේ සංවිධානය පෙනී සිටින බවත්, ඊට පූර්ණ සහයෝගය පළ කරන්නේ යැයි ප්රකාශ කළ බවත් ජනාධිපති මාධ්ය අංශය සඳහන් කරයි.
මෙම අවස්ථාව සඳහා විදේශ කටයුතු, විදේශ රැකියා සහ සංචාරක අමාත්ය විජිත හේරත්, එක්සත් ජාතීන්ගේ සංවිධානයේ ශ්රී ලංකා නිත්ය නියෝජිත, හිටපු අගවිනිසුරු ජනාධිපති නීතිඥ ජයන්ත ජයසූරිය යන මහත්වරු සහ විදේශ කටයුතු අමාත්යාංශයේ ජ්යෙෂ්ඨ නිලධාරීහු පිරිසක්ද එක්ව සිටියහ.
