කොළඹ LNW:අද (28) සිට රජයේ පාලන මිලටම සහල් නිකුත් කිරිමට තීරණය කර තිබෙන බව මහ පරිමාණ වී මෝල් හිමියන් පවසයි.
ප්‍රකට සහල් ව්‍යාපාරික ඩඩ්ලි සිරිසේන මහතා ඇතුළු මහා පරිමාණ වී මමෝල් හිමියන් අද පොළොන්නරුවේදී මාධ්‍ය හමුවක් කැඳවමින් මේ බව කියාසිටියේය.
මේ මොහොතේ රටේ සෑම කෙනෙක්ම කැපකිරීමක් කළ යුතු වන අතර මේ වන විට මිලදී ගෙන තිබෙන වී වලට කුමන පාඩුවක් සිදුවුවද අද සිට රජයේ පාලන මිලට සහල් වෙළෙඳපොළට නිකුත් කරන බවයි සිරිසේන මහතා පැවසුවේ.
එය එළඹෙන ජනවාරි 22 දක්වා ක්‍රියාත්මක වන අතර ඒ වන විට මහ කන්නයේ අස්වැන්න පැමිණෙන හෙයින් එම අස්වැන්න අනුව ගොවියන් ව්‍යාපාරිකයින් හා පාරිභෝගිකයින් සමඟ සාකච්ජා කර නව මිලක් තීරණය කර ගැනීමට අපේක්ෂා කරන බවයි ඔහු එහිදී තවදුරටත් සඳහන් කළේ.
රජයේ පාලන මිලට අනුව කීරි සම්බා කිලෝවක් අලෙවි කළ හැකි උපරිම මිල වන්නේ රු.260කි. සම්බා කිලෝවක් රු.230ට මිල නියම කර තිබෙන අතර නාඩු කිලෝවක පාලන මිල වන්නේ රු.220කි. එමෙන්ම රතු කැකුළු කිලෝවක පාලන මිල රු.210ක් ලෙසයි දැක්වෙන්නේ.
ආශිකා බ්‍රාහ්මණ
