කොළඹ LNW:හිටපු ආරක්ෂක ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර යන මහත්වරුන්ට එරෙහිව අධිකරණයට අපහාස කිරීමේ චෝදනා ඉදිරිපත් කිරීමට අපේක්ෂා කරන බව පෙත්සම්කාර පාර්ශවයක් ශ්රේෂ්ඨාධිකරණය දැනුම්දී තිබේ.
පාස්කු ඉරුදින ත්රස්ත ප්රහාරයක් එල්ල වීමට නියමිත බවට බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීම පිළිබඳව ශ්රේෂ්ඨාධිකරණය දුන් තීන්දුව ක්රියාත්මක කිරීම සම්බන්ධයෙන් එලෙස චෝදනා එල්ල කරන බවටයි පෙත්සම්කර පාර්ශවය සඳහන් කරන්නේ.
නීතිඥ ගාමිණී පෙරේරා මහතා මාර්ගයෙන් ඉදිරිපත් කළ මෝසමක් මගින් මෙම කරුණු අධිකරණයට දැනුම් දී තිබුණි.
පාස්කු ඉරුදින ත්රස්ත ප්රහාරය පිළිබඳව කලින්ම බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීම තුළින් හිටපු ජනාධිපති මෛත්රිපාල සිරිසේන, හිටපු ආරක්ෂක ලේකම් හේමසිරි ප්රනාන්දු, හිටපු පොලිස්පති පූජිත් ජයසුන්දර සහ හිටපු රාජ්ය බුද්ධි අංශ ප්රධානී නිලන්ත ජයවර්ධන මූලික මිනිස් අයිතිවාසිකම් උල්ලංඝනය කර ඇති බව ශ්රේෂ්ඨාධිකරණය පසුගිය ජනවාරි මස 12 වැනිදා තීන්දුව ප්රකාශයට පත්කරන ලදී.
එහිදී මූලික මිනිස් අයිතිවාසිකම් උල්ලංඝනය කිරීම් වෙනුවෙන් හිටපු ජනාධිපති මෛත්රීපාල සිරිසේන විසින් රුපියල් මිලියන 100 ක් ද, හිටපු පොලිස්පති පූජිත් ජයසුන්දර සහ රාජ්ය බුද්ධි සේවයේ හිටපු ප්රධානී නිලන්ත ජයවර්ධන රුපියල් මිලියන 75 ක් බැගින්ද, හිටපු ආරක්ෂක ලේකම් හේමසිරි ප්රනාන්දු විසින් රුපියල් මිලියන 50 ක් ද, හිටපු ජාතික බුද්ධි ප්රධානී සිසිර මෙන්ඩිස් විසින් රුපියල් මිලියන 10 ක්ද වන්දි වශයෙන් ගෙවිය යුතු බවට ශ්රේෂ්ඨාධිකරණය නියෝග කර ඇත.
ASK
