කොළඹ LNW: ජ්‍යෙෂ්ඨ මාධ්‍යවේදී සුන්දර නිහතමානි ද මැල් මහතා විසින් රචිත “මානිගෙ තීරුව NOT OUT 36 ” අද (29) BMICH පරිශ්‍රයේ ජාත්‍යන්තර පොත් ප්‍රදර්ශනයේදී සරසවි ප්‍රකාශනයක් ලෙස එළි දැක්විය.
පුවත් පත් කලාව තුළ “මානිගෙ තීරුව ” වැඩිම කාලයක් ලියවී ඇති සිංහල පුවත්පත් තීරුව වන අතර 1989දී “දිවයින ඉරිදා සංග්‍රහයෙන්” ඇරඹුණු එය 1994දී “ලක්බිම ඉරිදා සංග්‍රහයට”ද 2019දී “සතිඅග අරුණට”ද මාරු විය.
ඒ අනුව අද වන විට එය අවුරුදු තිස්හයක් තිස්සේ ලියවී තිබේ.
වසර 2018 සිට 2025 දක්වා ලියවුණු තීරු අසූවක් ඇතුළත් “මානිගෙ තීරුව NOT OUT 36 ” එලෙස අද ජනගත වූ අතර මහාචාර්ය නිර්මාල් රංජිත් දේවසිරි හා මැතිවරණ කොමිසමේ හිටපු සභාපති මහින්ද දේශප්‍රිය මෙහිදී මානිගෙ තීරුව ගැන ප්‍රධාන දේශන පැවැත්වූහ.
සභාව මෙහෙයවීම සමන් අතාවුදහෙට්ටි මහතා විසින් සිදුකරන ලදී.
ආගමික නායකයින්, දේශපාලකයින්,මාධ්‍ය වෘත්තියකයින් ඇතුළු මැල් මහතාගේ හිතවතුන් රැසක් එම අවස්ථාවට එක්ව සිටියහ.
ජායාරූප – අජිත් සෙනෙවිරත්න
