රෂිකා හෙන්නායක සැප්තැම්බර් 29 කොළඹ LNW :
ඊයේ (28) පස්වරුවේ ටෝකියෝ හි Reiyukai ශාලාවේදී, ජනාධිපති අනුර කුමාර දිසානායක මහතා ජපානයේ වෙසෙන ශ්‍රී ලාංකික ප්‍රජාව සමඟ හමුවකට එක් වූයේය.
ජපානයේ ශ්‍රී ලංකා තානාපති කාර්යාලය සහ ස්වේච්ඡා සංවිධානවල එකමුතුවෙන් සංවිධානය කර තිබු මෙම හමුවට ජපානයේ වෙසෙන මහා සංඝරත්නය, ආගමික පූජකවරු මෙන්ම වෘත්තීයවේදීහු, විශ්වවිද්‍යාල සිසුහූ ඇතුළු විශාල පිරිසක් එක්ව සිටී අතර ඔවුන්ගේ සුව දුක් විමසූ ජනාධිපති අනුර කුමාර දිසානායක මහතා , ඔවුන් විසින් මතු කළ ගැටලු පිළිබඳවද මෙහිදී සාකච්ඡා කළේය.
රට තුළ ආර්ථික ස්ථාවරත්වය ඇති කිරීම, නීතියේ විධානයේ ආධිපත්‍යය තහවුරු කිරීම, වංචා, දූෂණවලින් තොර පාලනයක් ඇති කිරීම, රාජ්‍ය යාන්ත්‍රණය කාර්යක්ෂම කිරීම සඳහා ගත් පියවර, රාජ්‍යතාන්ත්‍රික සමබරතාව ආරක්ෂා කර ගැනීම, ජාතික සමගිය ආරක්ෂා කර ගැනීම යන ක්ෂේත්‍ර ඔස්සේ පසුගිය වසර තුළ දැමු ශක්තිමත් අත්තිවාරම පිළිබඳ මෙහිදී පැහැදිලි කළ ජනාධිපතිවරයා ආණ්ඩුවේ වසරක ගමන් මගෙහි සාර්ථකත්වය මැනිය යුත්තේ ඒ මත පදනම්ව බවද පෙන්වා දුන්නේය.
