කොළඹ LNW: එළඹෙන මහ මැතිවරණයට තමන් ඉදිරිපත් නොවන බව හිටපු මුදල් රාජය අමාත්‍ය ශෙහාන් සේමසිංහ මහතා මාධ්‍ය නිවේදනයක් නිකුත් කරමින් පවසයි.
මැතිවරණයට ඉදිරිපත් නොවුණද දේශපාලන කටයුතුවල නිරත වෙන බවත් තමන් සම්බන්ධයෙන් විශ්වාසය තැබූ අනුරාධපුර ජනතාව වෙනුවෙන් තමන් තවදුරටත් සේවය කරන බවයි සේමසිංහ මහතා සඳහන් කරන්නේ.
ජනතාව විශ්වාස කළේ ප්‍රතිඵලය නොව පොරොන්දු දේශපාලන බවත් ජනතාවගේ තේරීම වුණේ ජනාකාන්තවාදී මාවත බවත් පසුගිය ජනාධිපතිවරණ ප්‍රතිඵල මඟින් පෙන්නුම් කර තිබෙන බව සේමසිංහ මහතා කියාසිටියි.
මහත් පරිශ්‍රමයෙන් ගොඩනැගූ ප්‍රතිපත්තිගරුක දේශපාලන මාවත ජනතාව ප්‍රතික්ෂේප කිරීම සම්බන්ධයෙන් තමන්ට ඇත්තේ විශාල කම්පනයක් සහ කලකිරීමක් බවද ඔහු සිය නිවේදනයේ දක්වා තිබේ.
බලය ලබා ගැනීමට මෙන්ම බලය අත්හැරීමට ද හැකියාව තිබිය යුතු බවත් බලය තිබුණු කාලයේ අවංකව සේවය කිරීමට හැකියාව ලද නිසා බලය අත්හැරීමට කිසිදු දුකක් නොමැති බවත් හිටපු රාජ්‍ය අමාත්‍යවරයා සඳහන් කරයි.
ඉදිරියේදී රටට අවශ්‍ය ඕනෑම මොහොතක සිය සේවය ලබාදීමට නිරහංකාරව ඉදිරිපත් වන බවටද ඔහු සහතික වෙයි.
ශෙහාන් සේමසිංහ මහතා අවසන් වරට ශ්‍රී ලංකා පොදුජන පෙරමුණ නියෝජනය කරමින් පසුගිය පාර්ලිමේන්තුවට තේරී පත් වූ අතර අවසන් වුණු ජනාධිපතිවරණ මැතිවරණයේදී හිටපු ජනාධිපති රනිල් වික්‍රමසිංහ මහතාට සහය පළකරමින් පැවති ආණ්ඩුව සමඟ රැඳී සිටිමින් කටයුතු කරන ලදී.
ආශිකා බ්‍රාහ්මණ
