හිටපු ජනාධිපති ගෝඨාභය රාජපක්ෂ මහතා විසින් ආරම්භ කළ “ඉටුකම කොවිඩ් 19 සෞඛ්‍ය හා සමාජ ආරක්ෂණ අරමුදල” වසා දැමීමට කැබිනට් අනුමැතිය හිමිව තිබේ.
ඒ අනුව, එම අරමුදලේ නමින් ලංකා බැංකුවේ ආයතනික ශාඛාවේ පවත්වාගෙන ගිය අංක 85737373 දරණ නිල බැංකු ගිණුම 2022 ඔක්තෝබර් 18 වනදා සිට ක්‍රියාත්මක නොවන බවයි එම අරමුදලේ ලේකම් ආචාර්ය තාරක ලියනපතිරණ මහතා සඳහන් කළේ.
එහෙයින් එම ගිණුමට මුදල් බැර නොකරන ලෙසත් එම ගිණුමට බැර කිරීම සඳහා චෙක්පත් හා මුදල් තවදුරටත් ජනාධිපති කාර්යාලය වෙත නොඑවන ලෙසත් ඒ මහතා පරිත්‍යාගශීලීන්ගෙන් ඉල්ලා සිටියේය.
ඉටුකම අරමුදල සඳහා රුපියල් 2,207,164,785.58 ක මුදලක් ලැබී තිබුණු අතර 2018 ඔක්තෝබර් 18 වනදා වනවිට එහි රුපියල් 216,877,431.05 ක මුදලක් ඉතිරිව තිබී ඇත. එම මුදල ජනාධිපති අරමුදලට බැර කිරීමට කටයුතු කර ඇති අතර ඒ මුදල මෙරට ජනතාවට ජනාධිපති අරමුදල මගින් සැත්කම් හා වෛද්‍ය ප්‍රතිකාර වෙනුවෙන් වෛද්‍යාධාර වශයෙන් ලබාදෙනු බවත් සඳහන්.
RN
