රෂිකා හෙන්නායක ඔක්තෝබර් 21,කොළඹ (LNW):
වංචා සහගත ලෙස ව්‍යාජ දුරකතන ඇමතුම් ලබාදී මුදල් සොරා කන පුද්ගලයින්ට නොරැවටෙන ලෙස පොලිසිය ජනතාවගෙන් ඉල්ලා සිටී.
ලංකා ගමනාගමන මණ්ඩලයට අයත් ඩිපෝ 9කට පමණ ව්‍යාජ ඇමතුම් ලබාදී එහි ජ්‍යෙෂ්ඨ නිලධාරීන් අනතුරකට ලක්ව ඇති බව පවසා ඊෂි කෑෂ් ක්‍රමයට මුදල් එවන ලෙස දැනුම් දී තිබෙන අතර, ඇතැම් ස්ථානවලින් මුදල් ලබාදීම් ද සිදුකර ඇති බව පොලිසිය සඳහන් කරයි.
සංවිධානාත්මක පිරිසක් වසර ගණනාවක සිට මෙම ජාවාරම සිදුකරගෙන යන බව මේ වන විට හෙළිවී ඇති අතර, එසේ දුරකතන ඇමතුම් ලබාදෙන පුද්ගලයින් ගරාජයක හිමිකරුවෙකු අනතුර සිදුවූ ස්ථානයට පැමිණි පොලිස් නිලධාරියෙකු ලෙස හෝ විශේෂිත පුද්ගලයෙකු ලෙස අගවා විශ්වාසය ගොඩනගාගනිමින් මෙම ජාවාරම සිදුකරන බව පොලිසිය පවසයි.
මෙවැනි වංචනික පුද්ගලයින්ට හසු නොවන ලෙසත් ඒ සම්බන්ධයෙන් දැඩි අවධානයෙන් පසුවන ලෙසත් පොලිසිය ජනතාවට දැනුම් දෙයි.
