කොළඹ LNW: චීන ජනාධිපති ෂී ජින් පිං මහතා ඇතුළු නායකයෝ බ්‍රික්ස්+ නායකයන්ගේ සංවාදයට එක් වුණා.
ඒ ඊයේ(24) රුසියාවේ Kazan ප්‍රදර්ශන මධ්‍යස්ථානයේදී ය. ෂී ජින් පිං මහතා ඊට එක් වෙමින් ගෝලීය දකුණේ බලවේග එක්රැස් කර පොදු ඉරණමක් සහිත මානව ප්‍රජාවක් ගොඩනැගීම ඒකාබද්ධව ප්‍රවර්ධනය කිරීමේ තේමාවෙන් දේශනයක් සිදු කර තිබෙනවා.
සාමය තහවුරු කිරීමෙන් පොදු ආරක්ෂාව ඉටු කිරීම, සංවර්ධනය ඔස්සේ විශ්වීය සමෘද්ධිය සාක්ෂාත් කිරීම, පොදු ශිෂ්ටාචාරයන් නිර්මාණය කිරීමෙන් විවිධත්වයෙන් යුත් සමගිය ගොඩනැගීම පිළිබඳව ඔහු එහිදි අවධාරණය කළා.
ගෝලීය දකුණේ රටවල් ඒකාබද්ධව නවීකරණයට පිවිසීම ලෝක ඉතිහාසයේ ප්‍රධාන සිදුවීමක් වන අතර, මානව ශිෂ්ටාචාර ක්‍රියාවලියේ පෙර නොවූ විරූ ජයග්‍රහණයක් බව ෂී ජින් පිං මහතා පෙන්වා දී තිබෙනවා.
ජාත්‍යන්තර තත්ත්වය කෙසේ වෙනස් වුවද, චීනය සෑම විටම ගෝලීය දකුණ පිළිබඳව සැලකිලිමත් වන බවත්, බ්‍රික්ස් ව්‍යාපාරයට එක් වෙමින් පොදු ඉරණමක් සහිත මානව ප්‍රජාවක් ඒකාබද්ධව ප්‍රවර්ධනය කිරීමට චීනය ගෝලීය දකුණේ රටවලට සහාය දෙන බවත් ෂී ජින් පිං මහතා වැඩිදුරටත් පවසා තිබෙනවා.
දිනූෂි ධීරසිංහ
