රෂිකා හෙන්නායක ඔක්තෝබර් 26, කොළඹ LNW :
පසුගිය රජය සමයේ ප්‍රමිතියෙන් තොර ඖෂධ ආනයනය කිරීම සම්බන්ධයෙන් මූලික අයිතිවාසිකම් උල්ලංඝනය වී ඇති බවට ශ්‍රේෂ්ඨාධිකරණය විසින් ඉකුත් මාර්තු මාසයේදී තීන්දු කරන ලදී. එම තීන්දුවට අදාළව ගෙවන ලෙස නියම කළ වන්දි මුදල තවමත් සම්පූර්ණයෙන් ගෙවා නොමැති බව අධිකරණයට දැනුම් දීමෙන් අනතුරුව, හිටපු සෞඛ්‍ය අමාත්‍ය කෙහෙළිය රඹුක්වැල්ල සහ හිටපු සෞඛ්‍ය අමාත්‍යාංශ ලේකම් ජනක චන්ද්‍රගුප්ත ඇතුළු වගඋත්තරකරුවන් සිව්දෙනෙකු අද (26) ශ්‍රේෂ්ඨාධිකරණය විසින් ඇප මත මුදා හරින ලදී.
ransparency International Sri Lanka ආයතනය විසින් ගොනු කරන ලද පෙත්සමක් (motion) අධිකරණය හමුවේ සලකා බැලීමෙන් අනතුරුව මෙම නියෝගය නිකුත් කෙරිණි.
අගවිනිසුරු ප්‍රීති පද්මන් සූරසේන මහතාගේ ප්‍රධානත්වයෙන් යුත් ශ්‍රේෂ්ඨාධිකරණ විනිසුරු මඩුල්ලක් විසින් මෙම වගඋත්තරකරුවන් සඳහා විදේශ ගමන් තහනමක් ද පනවන ලදී.
පෙර සඳහන් කළ මූලික අයිතිවාසිකම් නඩුවේදී වගඋත්තරකරුවන් ලෙස නම් කරනු ලැබූ හිටපු අමාත්‍ය කෙහෙළිය රඹුක්වැල්ල ඇතුළු පාර්ශවයන් පස් දෙනෙකුට, වන්දි මුදලක් ගෙවන ලෙස ශ්‍රේෂ්ඨාධිකරණය මීට පෙර නියෝග කර තිබුණි.
අද පැවති නඩු විභාගයේදී, කෙහෙළිය රඹුක්වැල්ල වෙනුවෙන් පෙනී සිටි නීතිඥවරයා අධිකරණයට දැනුම් දුන්නේ, අධිකරණය විසින් නියම කරන ලද රුපියල් මිලියන 75ක වන්දි මුදලින් රුපියල් මිලියන 20ක් තම සේවාදායකයා විසින් දැනටමත් ගෙවා ඇති බවයි.
ශ්‍රේෂ්ඨාධිකරණය විසින් නිකුත් කරන ලද වන්දි ගෙවීමේ නියෝගය සම්පූර්ණයෙන් ඉටු කිරීමට අපොහොසත් වීම තුළින්, හිටපු අමාත්‍ය කෙහෙළිය රඹුක්වැල්ල සහ අනෙකුත් වගඋත්තරකරුවන් අධිකරණයට අපහාස කිරීමක් සිදු කර ඇති බවට චෝදනා කරමින් මෙම නව පෙත්සම ගොනු කර තිබුණි.
