අප රටේ සෞඛ්‍ය හා අධ්‍යාපන අංශයන්හි වත්මන් ගැටලු සහ එහි අනාගතය පිළිබඳ සාකච්ඡා කිරීම සඳහා අද දින විපක්ෂ නායක කාර්යාලයේ දී අවබෝධාත්මක හමුවක් පැවැත්වුණු අතර, එයට විපක්ෂ නායක සජිත් ප්‍රේමදාස මහතා සහ එක්සත් ජාතීන්ගේ ළමා අරමුදලේ (UNICEF) කලාපීය අධ්‍යක්ෂ සංජය විජේසේකර යන මහත්වරුන් එක් වූහ. යුනිසෙෆ් හි ශ්‍රී ලංකා නියෝජිත ක්‍රිස්ටියන් ස්කූග් මහතා ද මෙම සංවාදයට එක් විය.
යුනිසෙෆ්, එක්සත් ජාතීන්ගේ ජනගහණ අරමුදල (UNFPA) සහ ආහාර සහ කෘෂිකර්ම සංවිධානය (FAO) සමඟ සහයෝගයෙන් ශ්‍රී ලංකාවේ සෞඛ්‍ය සහ අධ්‍යාපන ක්ෂේත්‍ර සඳහා සමගි ජන බලවේගය විසින් ක්‍රියාකාරීව දායක වනු ඇති ආකාරය පිළිබඳ විපක්ෂ නායකවරයා විසින් මෙහි දී අදහස් දක්වන ලදී.
අප රටේ සෞඛ්‍ය හා අධ්‍යාපන ක්‍රම නංවාලීම සඳහා යුනිසෙෆ් සංවිධානයට දිය හැකි උපරිම සහයෝගය ලබා දෙන ලෙස විපක්ෂ නායක සජිත් ප්‍රේමදාස මහතා මෙහිදී යුනිසෙෆ් සංවිධානයෙන් දැඩි ලෙස ඉල්ලා සිටියේය.
මෙම සංවාදය තුළ ශ්‍රී ලාංකික පවුල් විසින් මුහුණ පාන්නා වූ පෝෂණ අභියෝග සහ අපගේ රෝග නිවාරණ සහ රෝග ප්‍රතිකර්ම, සෞඛ්‍ය ක්ෂේත්‍රවල පවත්නා දැවෙන ගැටලු ද දෙපාර්ශ්වයේ අවධානයට ලක්විය.
මෙම විෂයයන් පිළිබඳ විපක්ෂ නායක සජිත් ප්‍රේමදාස මහතා තුළ පවත්නා ගැඹුරු දැනුම ඇගයීමට ලක් කළ යුනිසෙෆ් සංවිධානයේ කලාපීය අධ්‍යක්ෂවරයා විසින් සහයෝගීතාවයේ වැදගත්කම ද අවධාරණය කරන ලදී.
එසේම සැමට දීප්තිමත් අනාගතයක් උදෙසා සමගි ජන බලවේගය තුළ පවත්නා නොසැලෙන කැපවීම අවධාරණය කරමින් සමගි ජන බලවේගයේ ප්‍රතිපත්ති කාන්තා හා ළමා අයිතිවාසිකම් කෙරෙහි දක්වා ඇති සුවිශේෂී අවධානයද, විපක්ෂ නායකවරයා විසින් මෙහි දි යුනිසෙෆ් සංවිධානයේ නියෝජිතයන් හමුවේ පැවසීය.
