ජෝන් කීල්ස් CG ඔටෝ පුද්ගලික සමාගමේ කොළඹ BYD වාහන ප්රදර්ශනාගාරය ඉදිරිපිටදී ඊයේ (04) විරෝධතාවක් පැවැත්විණි.
ඒ, BYD වාහන ඇනවුම් කර මාස ගණනක් ගතවී ඇතත් තවමත් ඒවා නොලැබුණු පාරිභෝගිකයින් පිරිසක් විසිනි.
තමන් ඇනවුම් කර ඇති BYD වාහන රේගුව විසින් රඳවාගෙන සිටින බැවින් වහාම බැංකු ඇපකරයක් මත ඒවා නිදහස් කරගෙන තමන්ට ලබාදෙන ලෙස ඉල්ලමින් ඔවුහු මෙම විරෝධතාවේ නිරත වූහ.
“ජෝන් කීල්ස් බලධාරීනි, මාස 5ක් වරායේ දිරන අපේ BYD රථ බැංකු ඇපකර දී වහා නිදහස් කර ගනු”, “උසාවිය අවසර දුන්නා ඒත් ජෝන් කීල්ස් මර නින්දේ” යනාදී වශයෙන් සඳහන් බැනර් ප්රදර්ශනය කරමින් ඔවුන් මෙම විරෝධතාවේ නිරත වන අයුරු දක්නට ලැබිණි.
චීනයෙන් මෙරටට ආනයනය කරන ලද BYD වාහන මාදිලි කිහිපයක මෝටර් ධාරිතාවය සම්බන්ධයෙන් ඇතිවූ ගැටලුවක් මත ශ්රී ලංකා රේගුව විසින් එම වාහන තොග කිහිපයක් රඳවා තබාගත් අතර අධිකරණය හමුවේ පැමිණි එකඟතාවක් අනුව එයින් කොටසක් බැංකු ඇපකර මත නිදහස් කරගෙන පාරිභෝගිකයින්ට ලබාදීමට BYD වාහන සඳහා මෙරට බලයලත් අලෙවි නියෝජිතයා වන ජෝන් කීල්ස් CG ඔටෝ සමාගම කටයුතු කළ නමුත් තවත් වාහන තොගයක් එසේ බැංකු ඇපකර ලබාදී නිදහස් කරගැනීමට ඔවුන් තවමත් කටයුතු කර නොමැත.
පසුගිය නඩු වාරයේදී ද මෙම වාහන බැංකු ඇපකරයක් මත මුදාහැරීමට හැකි බව රේගුව වෙනුවෙන් පෙනී සිටි අතිරේක සොලිසිටර් ජනරාල්වරයා ප්රකාශ කළ නමුත් ජෝන් කීල්ස් CG ඔටෝ සමාගම එවැනි එකඟතාවකට උනන්දුවක් නොදැක්වූ බවක් එහිදී පෙන්නුම් කෙරිණි.
සබැඳි පුවත් –
