රෂිකා හෙන්නායක නොවැම්බර් 05, කොළඹ LNW:
පාර්ලිමේන්තු කථානායක ආචාර්ය ජගත් වික්‍රමරත්න මහතාගේ ප්‍රධානත්වයෙන් පාර්ලිමේන්තුව අද උදෑසන 9.30ට රැස්වීමට නියමිතව තිබූ අතර, ශ්‍රී ලංකා ගුවන් හමුදාව වෙනුවෙන් වෙන් කෙරුණු රුපියල් බිලියන 4.261ක අතිරේක ඇස්තමේන්තුවක් අද දින විවාදයට ගෙන අනුමත කර ගැනීමට නියමිතව ඇත.
මෙම අරමුදල්, ගුවන් හමුදාව සඳහා මිනිසුන් රහිත ගුවන් යානා (UAV) පද්ධතියක් ස්ථාපිත කිරීමට යොදා ගැනීමට අපේක්ෂා කෙරේ.
මේ අතර, දුම්රිය බලවේග කට්ටල (power sets) හිඟය හේතුවෙන් දුම්රිය සේවාවලට සිදුවන බාධා අවම කර ගැනීමට පියවර ගනිමින් සිටින බව ප්‍රවාහන හා මහාමාර්ග නියෝජ්‍ය අමාත්‍ය ප්‍රසන්න ගුණසේන මහතා ඊයේ (04)පාර්ලිමේන්තුවේදී ප්‍රකාශ කළේය.
පාර්ලිමේන්තු මන්ත්‍රී ධනුෂ්ක රංගනාථ මහතා යොමු කළ ප්‍රශ්නයකට පිළිතුරු දෙමින් ඔහු මේ බව පැවසීය.
මීට පෙර දුම්රිය ඩිපෝවලදී වෙන වෙනම අලුත්වැඩියා කෙරුණු දුම්රිය එන්ජින් සහ මැදිරි, මේ වන විට නඩත්තු කටයුතු සහ අලුත්වැඩියාවන් සඳහා සම්පූර්ණ දුම්රිය කට්ටල (train sets) ලෙස රැගෙන එන බව නියෝජ්‍ය අමාත්‍යවරයා සඳහන් කළේය.
මෙම ක්‍රමවේදය මගින් දුම්රියවල තාක්ෂණික දෝෂ අවම කර ගැනීමට උපකාරී වනු ඇති බව ද ඔහු පෙන්වා දුන්නේය.
