රෂිකා හෙන්නායක නොවැම්බර් 10, කොළඹ (LNW):
වෙඩිතැබීමකින් කාන්තාවක් ඇතුළු පුද්ගලයින් දෙදෙනෙකු මියගොස් ඇති බව පොලිසිය පවසයි. එම වෙඩි තැබීම අම්බලන්ගොඩ, ඌරවත්ත ප්‍රදේශයේ සිදුවී ඇති බව වාර්තා වේ.
පොලීසිය පවසන්නේ, යතුරුපැදියකින් ගමන් කරමින් සිටි ඔවුන් දෙදෙනාට තවත් යතුරු පැදියකින් පැමිණි නාඳුනන තුවක්කුකරුවන් දෙදෙනෙකු විසින් වෙඩිතැබීම සිදුකර ඇති බවයි.
වෙඩි ප්‍රහාරයට ලක්වූ කාන්තාව සහ පිරිමි පුද්ගලයා එම ස්ථානයේ දීම මියගොස් ඇති අතර ඔවුන් අම්බලන්ගොඩ, කුලීගොඩ ප්‍රදේශයේ පදිංචිව සිටි 46 අඹුසැමි යුවළක් බව පැවසෙන අතර, මියගිය කාන්තාව මෙන්ම පිරිමි පුද්ගලයා ද මත්ද්‍රව්‍ය ජාවාරමට සම්බන්ධ අය බව ද පොලීසිය පවසයි.
මෙම වෙඩි තැබීම T 56 වර්ගයේ ගිනි අවියකින් සිදු කර ඇති බවට දැනට සිදුකළ විමර්ශනය අනුව පොලිසිය සැකකරනු ලබයි.
අම්බලන්ගොඩ පොලීසිය සිද්ධිය සම්බන්ධයෙන් වැඩිදුර විමර්ශන සිදුකරන බව පැවසේ.
