සටහන – රුවන් නෙළුගොල්ල
2023 වසරේදී ලන්ඩනයේ සිදුකළ සංචාරයක් සඳහා රජයේ මුදල් අවභාවිතා කළ බවට හිටපු ජනාධිපති රනිල් වික්‍රමසිංහ මහතාට එරෙහිව ඇති නඩුවේ විමර්ශන මාසයක් තුළ අවසන් කර ඉහළ අධිකරණයක නඩු පැවරීමට කටයුතු කරන බව නීතිපතිවරයා විසින් කොටුව මහේස්ත්‍රාත් අධිකරණයට දැනුම් දී තිබේ.
අදාළ නඩුව මෝසමක් මාර්ගයෙන් ඊයේ (19) කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් මහතා මේ බව අධිකරණයට දැනුම් දුන්නේය.
මෙම නඩුවට අදාළව තමන්ට එරෙහිව පනවා ඇති විදෙස් ගමන් තහනම ඉවත් කරන ලෙස හිටපු ජනාධිපති ලේකම් සමන් ඒකනායක මහතා විසින් මෝසමක් මාර්ගයෙන් කළ ඉල්ලීමක් සලකා බැලීම සඳහා ඊයේ මෙම නඩුව කොටුව මහේස්ත්‍රාත් අධිකරණය හමුවේ කැඳවා තිබිණි.
කෙසේවෙතත් නඩුවේ විමර්ශන කඩිනමින් අවසන් කරන බව පැමිණිලිකාර පාර්ශ්වය විසින් අධිකරණය හමුවේ පැවසීම හේතුවෙන් සිය සේවාදායකයාට එරෙහිව පනවා ඇති විදෙස් ගමන් තහනම ඉවත්කරන ලෙස කර තිබූ ඉල්ලීම ඉවත්කර ගැනීමට හිටපු ජනාධිපති ලේකම් සමන් ඒකනායක වෙනුවෙන් පෙනී සිටි නීතිඥයින් පියවර ගෙන ඇත.
