කොළඹ LNW:ජාතික ජන බලවේගය පාර්ලිමේන්තුවේ තුනෙන් දෙකක බලයක් සහිතව ශක්තිමත් ආණ්ඩුවක් පිහිටුවා ගෙන ඇත. ඔවුන් ලැබූ ජයග්‍රහණය ඔවුන්වත් බලාපොරොත්තු නොවූ ජයග්‍රහණයකි. තවම ඔවුන් කෝඩුකාරය. එහෙත් මෙතෙක් ගෙන ඇති පියවර සාපේක්ෂ වශයෙන් සාධනීයය. එනමුදු තවම ඇඟට දැනෙන වෙනසක් කිරීමට ඔවුන් සමත් වී නැත. එවැන්නකට තවම කල් මදිය. තවම කර ඇත්තේ ප්‍රදර්ශනාත්මක වෙනස්කම් පමණි. නමුත් ඒවාද ධනාත්මකය.
නමුත් විපක්ෂ නායක සජිත් ප්‍රේමදාසට නම් මේ තත්ත්වය කොහොමවත් දිරවන්නේ නැත. සජිත්ගේ ප්‍රවේශය සාමාන්‍ය පුරවැසියන් වන අපටද දිරවන්නේ නැත.
මගේ අදහස නම් සජිත් දැන් අල්ලා ගෙන සිටිනුයේ වැරදි කොනක් බවයි. සජිත්ගේ මතය අනුව මාලිමාව ජාත්‍යන්තර මූල්‍ය අරමුදල පිළිබඳව ජනතාවට දුන් පොරොන්දු කඩකර ඇත. ඔහු පවසනුයේ ජාත්‍යන්තර මූල්‍ය අරමුදල සම්බන්ධයෙන් මාලිමාව ජනතාවට දුන් පොරොන්දු සම්පූර්ණයෙන් කඩකර ඇති බවකි. සජිත් දවසට විසිතිස් වතාවක් මේ මන්ත්‍රය ජපකරයි. හරියට දේවාලවලට ගොස් පොල් ගසන මිසදිටුවන් තමන්ට එරෙහි පාර්ශවවලට සාප කරන ආකාරයටය එතුමා අදහස් පළකරනුයේ. සජිත්ට අනුව මාලිමාවට ඡන්දය දුන් ජනතාව දැන් සිටිනුයේ කෝපයෙනි. නමුත් සජිත්ට අමතක වූ හෝ අමතක කළ කරුණක් ඇත. එනම් අනුර කුමාර ජනාධිපතිවරයා ජයග්‍රහණය කළ අවස්ථාවේදී ද IMF සමඟ ගනුදෙනු කරන ආකාරය පිළිබඳව දැක්වූයේද මෙම මෘදු ක්‍රමවේදය බවය.
IMF සමඟ සාකච්ඡා කර යම් යම් වෙනස්කම් කරන බව හා එයට ඉඩ නොලැබුනත් දිගටම IMF සබඳතා පවත්වා ගෙන යන බව ජනාධිපති කීවා මට මතකය. කෙසේ වුවත් මේ ගැන ජනතාව විරසක නම් පාර්ලිමේන්තු මැතිවරණයේදී මෙවන් ජයග්‍රහණයක් ලබන්නේ නැත. පාර්ලිමේන්තු මැතිවරණයේදී ජනාධිපති ඡන්දයේ දී ඔවුන් ලබා ගත් ඡන්ද ප්‍රමාණය ලක්ෂ 68දක්වා එසවුන බව අමතක නොකළ යුතුය. එසේම සජිත්ලාගේ ඡන්ද ප්‍රමාණය ලක්ෂ 19 දක්වා අඩුවූ බවද අමතක නොකළ යුතුය. මට නම් ප්‍රශ්නයක්ව තිබුණේ අනුර කුමාරලා සර්කස් දැමීමට ගොස් රටද සමග වැල් පාලමෙන් බිමට වැටේදැයි යන බියයි.
අනේ අපොයි මේ අපේ රටෙි විපක්ෂ නායකතුමා නේද ?
උපාලි කොළඹගේ
