සටහන – රුවන් නෙළුගොල්ල
මහවිරු සැමරුම් සම්බන්ධ වීඩියෝ පට ෆේස්බුක් සමාජ මාධ්‍ය ජාලය තුළ හුවමාරු කිරීම සම්බන්ධයෙන් අත් අඩංගුවට ගත් ශ්‍රී ලංකා පොදුජන පෙරමුණේ පාලක ලේකම් රේණුක පෙරේරා ඇප මත මුදාහැරීමට කොළඹ මහේස්ත්‍රාත් අධිකරණය ඊයේ (05) නියෝග කර තිබේ.
ඒ අනුව රුපියල් ලක්ෂ 10 බැගින් වූ ශරීර ඇප දෙකක් මත ඔහුව මුදා හැරීමටයි කොළඹ අතිරේක මහේස්ත්‍රාත් මංජුල රත්නායක මහතා නියම කර ඇත්තේ.
අදාළ වීඩියෝ පට නිර්මාණය කළ පුද්ගලයින් හා ඒවා ෆේස්බුක් සමාජ මාධ්‍ය ජාලයට උඩුගත කළ පුද්ගලයින් පිළිබඳ විමර්ශනයක් සිදුකර ඇත්දැයි අතිරේක මහේස්ත්‍රාත්වරයා කළ විමසීමකදී CID නිලධාරීන් ප්‍රකාශ කර තිබුණේ එවන් විමර්ශනයක් සිදුකර නොමැති බවයි.
ඒ අනුව එම වීඩියෝ පට සකස් කළ සහ උඩුගත කළ පුද්ගලයින් සම්බන්ධයෙන් විමර්ශනයක් නොපවත්වා ඒවා හුවමාරු කළ පුද්ගලයින් අත් අඩංගුවට ගෙන ඔවුන්ව රක්ෂිත බන්ධනාගාරගත කරන ලෙස ඉල්ලා සිටීම කොතරම් යුක්ති සහගත දැයි CID නිලධාරීන්ගෙන් ප්‍රශ්න කළ අතිරේක මහේස්ත්‍රාත්වරයා සැකකරු ඇප මත මුදා හැරීමටත් පැමිණිල්ල 2025 ජුනි 10 වනදා නැවත කැඳවීමටත් නියම කළේය.
