කොළඹ LNW:යාපනය දිස්ත්‍රික්කයේ හඳුනා නොගත් උණ රෝගී තත්ත්වයක් පැතිර යන බව සෞඛ්‍ය අමාත්‍යංශයේ වසංගත රෝග විද්‍යා අංශයේ වෛද්‍ය කුමුදු වීරකෝන් මහත්මිය පැවසුවාය.
අද (11) සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවේදීයි ඇය මේ බව සඳහන් කළේ.
මෙම රෝගී තත්ත්වය මී උණ රෝගී තත්ත්වයද යන්න හඳුනා ගැනීම සඳහා මේ වනවිට පරීක්ෂණ පැවැත්වෙන බවද වෛද්‍යවරිය සඳහන් කළාය.
උණ රෝගී තත්ත්වය හේතුවෙන් යාපනයෙන් වාර්තා වූ මරණ 05ක් සම්බන්ධයෙන් විශේෂ පරිෂණයක් ද ආරම්භ කර තිබේ.
විශේෂයෙන් උණ, සහ ශ්වසන අපහසුතා එම ප්‍රදේශ තුළින් වාර්තා වී ඇත.
මේ වන විට මී උණ රෝගයද වේගයෙන් පැතිර යමින් තිබෙන අතර වී ගොවිතැන ආශ්‍රිතව මඩ සහ ජලය ආශ්‍රිතව වගා කටයුතුවල නිරතව සිටින ගොවීන්, ගංවතුරට මුහුණ දී සිටින පිරිස්, කුඹුරු හා ජලය ආශ්‍රිතව වෙනත් රාජකාරි කටයුතුවල නිතරව සිටින්නන්, පතල් ආශ්‍රිතව සහ ජලය ආශ්‍රිත රැකියා කරන්නන් මී උණ රෝගයට ගොදුරු වීමේ වැඩි අවධානමට ලක්වන බවයි වෛද්‍යවරිය පැවසුවේ.
තද උණ, තදබල මස්පිඩු වේදනාව, ඇස් රතුවීම, මී උණ රෝගයේ රොගී ලක්ෂණ වන අතර ඒ සමග වමනය, හිසරදය, ශරීරයේ අප්‍රාණික බව, මුත්‍රා සමග ලේ පිටවීම, මුත්‍රා පිටවීම අඩුවීම වැනි රෝග ලක්ෂණද ඇති විය හැකි හෙයින් මෙම රෝග ලක්ෂණ ගැන අවධානයෙන් පසුවී වහාම ප්‍රතිකාර සඳහා යොමුවිය යුතු බව ඇය ප්‍රකාශ කළාය.
රෝගී තත්ත්වය උත්සන්න වුවහොත් එය වකුගඩු, අක්මාව, මොළය ඇතුළු ශරීරයේ අවයව සඳහා දැඩි හානි සිදුකරන හෙයින් මරණයට පවා පත් විය හැකි බවත් ඇය අවධාරණය කළේ.
කුඹුරු හා ජලය ආශ්‍රිත රැකියවන් සඳහා යොමුවන පිරිස් සඳහා සෞඛ්‍ය අමාත්‍යාංශය විසින් ප්‍රතිජිවක ඖෂධ ලබා දෙන අතර තමන්ගේ ප්‍රදේශයට අදාළ සෞඛ්‍ය වෛද්‍ය නිලධාරී කාර්යාලයේ මහජන සෞඛ්‍ය පරීක්ෂකවරයා මගින් එම රතිජීවක ඖෂධ නොමිලයේ ලබා ගත හැකි බවයි වෛද්‍යවරිය තවදුරටත් පැවසුවේ.
2023 වසරේ දිවයින පුරා මී උණ රෝගීන් 9,000කට අධික පිරිසක් වාර්තා වී තිබෙන අතර ඉන් රෝගීන් 200කට ආසන්න ප්‍රමාණයක් මියගොස් ඇති බවද ඇය වැඩිදුරටත් සඳහන් කරන ලදී.
ආශිකා බ්‍රාහ්මණ
