රෂිකා හෙන්නායක දෙසැම්බර් 14, කොළඹ (LNW):
කථානායක අශෝක රංවල මහතා පාර්ලිමේන්තුවට ඉදිරිපත් කර ඇතැයි, පැවසෙන ව්‍යාජ අධ්‍යාපන සුදුසුකම් පිළිබඳ සමාජ විරෝධය හේතුවෙන් ඔහු සිය ධුරයෙන් ඉල්ලා අස්වීම ප්‍රශංසනීය බව පාර්ලිමේන්තු මන්ත්‍රි නාමල් රාජපක්ෂ මහතා පවසයි.
ඒ අනුව තවදුරටත් චෝදනා එල්ල වන ආණ්ඩුවේ අනෙකුත් මන්ත්‍රීවරුන් තමන් සමාජගත කර ඇති අධ්‍යාපන සුදුසුකම් ඔප්පු කිරීමට අපොහොසත් වන්නේ නම්, වහාම ඉල්ලා අස්විය යුතු බවද ඔහු එක්ස් පණිවිඩයක් නිකුත් කරමින් කියා සිටී.
තවදුරටත් නාමල් රාජපක්ෂ මහතා සිය එක්ස් පණිවිඩයෙන් පෙන්වා දී තිබෙන්නේ, ජනාධිපති අනුර කුමාර දිසානායක මහතාගේ සුපිරිසිදු පාර්ලිමේන්තුවක් පවත්වාගෙන යාමේ දර්ශනයට විරුද්ධව එම පක්ෂයේ ඇතැමුන් තම අධ්‍යාපන සුදුසුකම් පිළිබඳ ජනතාව නොමග යවා තිබීම අතිශය කණගාටුදායක බවයි.
