කුඩා දැරියකට අමානුෂික ලෙස පහරදීම සම්බන්ධයෙන් අත් අඩංගුවට ගෙන රක්ෂිත බන්ධනාගාරගත කර සිටින එම්. කේ. චමින්ද නොහොත් කුකුල් චමින්ද නමැත්තා රෝහල්ගත කිරීම සම්බන්ධයෙන් බන්ධනාගාර දෙපාර්තමේන්තුව නිවේදනයක් නිකුත් කර තිබේ.
මෙම සැකකරුට අනුරාධපුර බන්ධනාගාරය තුළදී රැඳවියන් පිරිසක් විසින් කළ පහරදීමක් හේතුවෙන් ඔහු තුවාල ලබා රෝහල්ගත කර ඇති බවට මාධ්‍ය වාර්තා පළවී තිබිණි.
මේ සම්බන්ධයෙන් අනුරාධපුර බන්ධනාගාර අධිකාරීවරයා විසින් වාර්ථාවක් කැඳවු අතර, බන්ධනාගාරය තුළදී සැකකරුට නේවාසිකියින් විසින් කිසිදු පහරදීමක් සිදු කර නොමැති බව එම වාර්තාවෙන් අනාවරණය වී ඇති බව බන්ධනාගාර මාධ්‍ය ප්‍රකාශක ගාමිණි බී. දිසානායක මහතා පවසයි.
ඔහුව බන්ධනාගාරගත කළ පසුව අධිකරණය වෛද්‍ය නිලධාරියා වෙත ඉදිරිපත් කළ අතර එහිදී ලද උපදෙස් අනුව ඔහුව රෝහල්ගත කළ බවයි බන්ධනාගාර දෙපාර්තමේන්තුව සඳහන් කරන්නේ.
බන්ධනාගාර නිලධාරීන්ගේ ආරක්ෂාව යටතේ අනුරාධපුර ශික්ෂණ රෝහලට ඇතුළත් කර සිටි ඔහුව ඊයේ (08) දිනයේදී නැවත අනුරාධපුර බන්ධනාගාරයට රැගෙනවිත් ඇති බවත් වාර්තා විය.
මෙම සැකකරු අත් අඩංගුවට ගත් අවස්ථාවේදී පොලිස් නිලධාරීන් විසින් රැගෙන, සමාජ මාධ්‍ය තුළ පළකර තිබූ ඡායාරූප අනුව ඒ අවස්ථාවේදී ඔහු පහරදීමකට ලක්ව ඇති බව පෙනේ.
RN
