තරුශි හයසීයෙන් අට සීයට පාර කපා ගන්න ස්පාඤ්ඤයට යයි

සටහන – නිශ්මං රණසිංහ

ජුනි 11, කොළඹ (LNW): තරුශි කරුණාරත්න ස්පාඤ්ඤයේ පැවත්වෙන bilbaoatletis මලල ක්‍රීඩා සූරතාවලිය නියෝජනය කරමින් එහි පැවත්වෙන මීටර් 600 ඉසව්ව නියෝජනය කරන්නට නියමිතය.ඇය 14 වන දා දිවයිනෙන් පිටත්ව යාමට නියමිත අතර එහිදී ඇය උත්සාහ කරනු ලබන්නේ පැරිස් ඔලිම්පික් උළෙල සඳහා සුදුසුකම් ලැබීමට අවශ්‍යය මට්ටමට ළඟා වීමටය.

තරුශි ඔලිම්පික් සුදුසුකම් ලබා ගැනීමට උත්සාහ කරන්නේ මීටර් 800 ඉසව්වෙන්ය.එහි සෘජු සුදුසුකම සඳහා තරුශි මීටර් 800 ඉසව්ව විනාඩි 1:59.30 න් නිමා කළ යුතුව ඇත.මේ කාලය වාර්තා කරන්නට මීටර් 800 ඉසව්ව ස්පාඤ්ඤ උළෙලට ඇතුළත් නොවන අතර ඒ වෙනුවට ඇතුළත් කර තිබෙන්නේ මීටර් 600 ඉසව්වය.ඇය මීටර් 800 ඉසව්වේ දී විනාඩි 1:59.30 ට නිමා කිරීමෙන් ජාත්‍යන්තර මලල ක්‍රිඩා ලකුණු සටහනෙන් හිමි කර ගත හැකි ලකුණු හා සමාන ලකුණු ප්‍රමාණයක් හිමි කර ගැනීමට නම්, මෙම මීටර් 600 ඉසව්ව විනාඩි 1:24.71 සහ විනාඩි 1:24.67 දක්වා අතර කාලයකින් නිමා කළ යුතුව ඇත.