සටහන – රුවන් නෙළුගොල්ල
අන්තර්ජාලය ඔස්සේ මූල්‍ය වංචාවල නිරතවීම සම්බන්ධයෙන් චීන ජාතිකයින් 30 දෙනෙකු අපරාධ පරීක්ෂණ දෙපාර්තමේන්තුව විසින් ඊයේ (28) අත් අඩංගුවට ගෙන තිබේ.
මොවුන් මීගමුව ප්‍රදේශයේ හෝටලයක රැඳී සිටියදී අත් අඩංගුවට ගත් බවයි පොලිස් මාධ්‍ය ප්‍රකාශක, නියෝජ්‍ය පොලිස්පති නිහාල් තල්දූව මහතා සඳහන් කළේ.
එමෙන්ම මෙරට ප්‍රදේශ කිහිපයක නිවාසවල සිටිමින්, ඉන්දියාවේ තහනම් කළ ඔන්ලයින් සූදු ක්‍රීඩාවක් හරහා මූල්‍ය වංචාවන් සිදුකළ ඉන්දීය ජාතිකයින් 137 දෙනෙකු ද ඊයේ දිනය වනවිට අත් අඩංගුවට ගෙන ඇත.
ඔවුන් සතුව තිබී ලැප්ටොප් පරිගණක සහ ජංගම දුරකථන රැසක් ද පොලිස් භාරයට ගෙන ඇති බවත් පොලිස් මාධ්‍ය ප්‍රකාශකවරයා වැඩිදුරටත් පැවසීය.
