සටහන:ඇඩොල්ෆ්
බංග්ලාදේශයේ අග්‍රාමාත්‍ය ෂීක් හසීනා ගේ ඉල්ලා අස්වීම සහ අගෝස්තු 05 වන දින ඈ ඉන්දියාවට පලා යාම පිටුපස තිබෙනා සිදුවීම් දාමය නිශ්චිතව ම පැහැදිලිකර ගැනීමට හැකියාවක් නොමැත. නමුත් බැලූ බැල්මට දක්නට තිබෙන්නේ ෂීක් හසීනා ගේ අණ පරිදි ක්‍රියාකොට ජනතාවගේ කුපිත වීම මැඬලීමට හා ඔවුන් අත්අඩංගුවට ගැනීමට හමුදාව පසුබට වීම මීට හේතුවක් විය හැකි බවයි.
මෙම පසුබිම තුළ රටින් පළා යනු හැරෙන්න ඈට වෙනත් විකල්පයක් නොමැති වන්නට ඇත, තම පවුල බංග්ලාදේශයෙන් පිටත ස්ථානයක ආරක්ෂිතව රඳවා තැබීමට ඈට අවශ්‍යවන්නට ඇත. 2006 නේපාලයේ දී ද ජනතා නැඟිටීමක් හමුවේ තම පුරවැසි ජනයාට වෙඩි තැබීම රාජකීය හමුදාව විසින් ප්‍රතික්ෂේපකළ අතර, මෙහි ප්‍රතිඵලයක් ලෙස දේශපාලන පසුබැසීමක් සිදුවී, ඉන් අනතුරුව රජුගේ ඔටුනු හැරයාම ද සිදුවිය.
ශ්‍රී ලංකාව තුළ තත්ත්වය ද වෙනස් නොවී ය. මාලදිවයිනට පළාගිය ගෝඨාභය යළි දිවයිනට පැමිණියේ ය. පාර්ලිමේන්තුව අත්පත්කර ගැනීමට විරෝධතාකරුවන්ට අවසර ලබා දීමට වත්මන් ජනාධිපති රනිල් වික්‍රමසිංහ කටයුතුකළේ නම් ශ්‍රී ලංකාව තවදුරටත් අර්බුදයේ පවතින්නට ඉඩ තිබිණි. නමුත් ශ්‍රී ලංකාවේ පැවති තත්ත්වයට සාපේක්ෂව බංග්ලාදේශයේ ආර්ථිකයේ ප්‍රගතියක් ඇතිවෙමින් පැවතිණි. බංග්ලාදේශ රජයේ ආර්ථික කාර්යසාධනය සුබදායී වූ අතර, 2026 වන විට බංග්ලාදේශය මධ්‍ය-ආදායම් ලබන රටක් විමේ සලකුණු පහළ වී තිබිණි. එරට ඒක පුද්ගල දළ දේශීය නිශ්පාදිතය ඉන්දියාව අභිබවා යෑම පවා නිරීක්ෂණය කළ හැකි විය.
මීට වෙනස් මුහුණුවරක් ගනිමින් ශ්‍රී ලංකාවේ ආර්ථික තත්ත්වය අර්බුදයක පැවති අතර පෙට්‍රල්, ගෑස් සහ විදුලිය සඳහා ජනතාව මහපාරේ අරගලයක නිරතවන ආකාරයක් දක්නට ලැබිණි.
මෙම තත්ත්වය ඉතා පහසුවෙන් අපට අමතකකළ හැකි ද? තමතමන්ගේ නායකවරුන්ගේ සුඛවිහරණය උදෙසා මෙම තත්ත්වය අපට අමතක කරවීමට ඇතැම් පුද්ගලයන් මාන බලනවා ද? එසේ කිරීමට ඔවුනට අයිතියක් තිබෙනවා ද?
කුමන පක්ෂයකින් කුමන අපේක්ෂකයකු මැතිවරණය සඳහා ඉදිරිපත් වූව ද, අගය කිරීමේ ලක්ෂණයක් ලෙස, ජනාධිපති රනිල් වික්‍රමසිංහට සිය ඡන්දය ප්‍රකාශ කිරීමට ජනතාව පෙළ ගැසී සිටින බව හිටපු රාජ්‍ය අමාත්‍ය රුවන් විජේවර්ධන පැවසුවේ ඊයේ දිනයේ පැවති මාධ්‍ය හමුවකදී ය.
මෙරට ඉහළම පුටුව තුළ වෙනසක් දැකීමේ අභිලාෂයක් ඉන්දියාව සතුව පවතින බවට මතිමතාන්තර පැතිර යමින් පවතියි. ශ්‍රී ලංකාව ඉන්දීය සාගරයේ භූගෝලීය වශයෙන් වැදගත්වන ස්ථානයක පිහිටා ඇති පසුබිමක, ශ්‍රී ලංකාවේ ප්‍රගතීන් ළඟින් නිරීක්ෂණය කිරීමට ඉන්දියාව කටයුතු කරන බව රහසක් නොවූව ද, ශ්‍රී ලංකාව සම්බන්ධයෙන් ඉන්දියාව දක්වන අවධානය වැඩි වශයෙන් ම මධ්‍යගත වන්නේ, ශ්‍රී ලංකාව චීනය වැනි ලෝක බලවතුන් සමඟ පවත්වා ගන්නා මිත්‍රත්වය හමුවේ මෙරටට ලැබී ඇති ආයෝජනයන් හා යටිතල පහසුකම් ව්‍යාපෘති කෙරේ ය.
ආර්ථික ස්ථායීතාවය
ජනතාවගේ ප්‍රධාන ගැටළු ඉතා පැහැදිලිවන පසුබිමක අනෙකුත් ලෝක බලවතුන්ගේ අවශ්‍යතාවය වී ඇත්තේ කුමක් ද? එය ජනතාවගේ අවශ්‍යතාවයන් හා වෙනස් වන්නේ ද? ආර්ථික අර්බුදය සමඟ ජනතාව තවමත් පොරබදිමින් සිටින පසුබිමක, ඒ හේතුවෙන් මෙරට ජනගහනයට මුහුණ දීමට සිදු වී ඇති අභියෝගයන් එමට ය. ආහාර හා ඉන්ධන වැනි අත්‍යාවශ්‍ය ද්‍රව්‍යවල මිල ගණන් අහස උසට නැඟ ගොසිනි. බොහෝ දෙනෙකු තම මූලික අවශ්‍යතා සපුරා ගැනීමේ අරගලයක නිරතවන බව පැහැදිලි ය. ජාත්‍යන්තර මූල්‍ය අරමුදලේ ණය පහසුකම ක්‍රියාත්මක වෙමින් පවතින පසුබිමක එම අරමුදලේ අනුදැනුමකින් තොරව එහි නියමයන් සහ කොන්දේසි වෙනස් කිරීමට කටයුතු කළහොත් එය තවත් අර්බුදයකින් අවසන් වීමට ඉඩ තිබේ.
බාගෙට පිලිස්සූ පාන්ගෙඩි වැනි අත්දැකීම්වලින් තොර දේශපාලඥයන්ගේ උවමනාවන් හා අපේක්ෂාවන් ඉටු කර දීමට අපට හැකියාවක් නොමැත. ජනතාවගේ ජීවනෝපායන් සමඟ සෙල්ලම් කිරීමට හැකියාවක් නොමැත. දෛවයේ සරදමක් මෙන් 2027 දී ඇ.ඩො. බිලියන 9 ක් ගෙවීමට තිබෙන බව ද අප අමතක නොකළ යුතු ය.
අප කළ යුත්තේ ණය නැවත ගෙවීමට වාණිජ අනුපාතවලට තවත් ණය ගැනීම ද? අපට පිළිතුරු අවශ්‍යයයි. දේශපාලන ස්ථාවරත්වය සහ ඵලදායී රාජ්‍ය පාලනය සහතික කිරීම, ප්‍රතිසංස්කරණ ක්‍රියාත්මක කිරීම සහ ජනතා විශ්වාසය පවත්වා ගැනීම කෙරේ අත්‍යාවශ්‍ය ය. විවිධ දේශපාලන කණ්ඩායම් කලමනාකරණය කරමින් ඇතුළත්භාවයෙන් යුතු දේශපාලන වටපිටාවක් නිර්මාණය කිරීම රට හමුවේ මතුව තිබෙන ප්‍රධාන අභියෝගයක් වී තිබේ.
අනෙකුත් ගැටළුව වන්නේ සමාජ සාධාරණත්වය සහ ජීවන තත්ත්වයි. ආර්ථික අභියෝග මධ්‍යයේ පැනනඟින ජනතා අමනාපය ආමන්ත්‍රණය කිරීම වැදගත් ය. දේශපාලන සහාය ලබා ගැනීම සඳහා මෙය භාවිතා වෙමින් පවතියි. ජීවන තත්ත්වයන් වැඩිදියුණු කිරීම, අසමානතා අවම කිරීම සහ සමාජ ආතතීන් අවම කිරීම ඉලක්ක කරගත් ප්‍රතිපත්ති සමාජ ස්ථාවරත්වය පවත්වා ගැනීම සඳහා ඉතා වැදගත් ය.
තිරසාර සංවර්ධනය හා පාරිසරික සුරක්ෂිතභාවය මීට විසඳුමයි. තිරසාර සංවර්ධන ප්‍රතිපත්ති ක්‍රියාත්මක කිරීම, ස්වභාවික සම්පත් ආරක්ෂා කිරීම සහ දේශගුණික විපර්යාසවල බලපෑම් ආමන්ත්‍රණය කිරීම සැලකිය යුතු කරුණු වේ. දිගුකාලීන වශයෙන් ජාතික සංවර්ධනය සහ පාරිසරික තිරසාරභාවය සහතික කිරීම සඳහා මෙම ප්‍රයද්නයන් අත්‍යාවශ්‍ය වේ.
රටට අවශ්‍ය වන්නේ මෙවන් ක්‍ෂේත්‍රවලින් ඉදිරියට යා හැකි නායකයෙකි.
රටේ අනාගතය
ශ්‍රී ලංකාව තුළ ආණ්ඩු මාරුවක් සිදුකිරීම සඳහා ඉන්දියාවේ මැදිහත්වීමක් ඇති බව පැවසීමට ප්‍රමාණවත් සාක්ෂි නොමැති වූව ද, රාජ්‍ය තාන්ත්‍රික සහභාගීත්වය, ආර්ථික අන්‍යොන්‍ය අවබෝධය, සහ කලාපීය ස්ථායීතාවය කෙරේ ඉන්දියාවේ අවධානය යොමුවිය යුතු ය. ඉහළ පුටුවල වෙනසක් සඳහා ඔවුන් කටයුතු කරන බවට ජනතාව විසින් වටහා ගනු වෙනුවට, ඉන්දියාව තම අවශ්‍යතා ආරක්ෂා කර ගැනීම සහතික කර ගත යුතුය.
මෙරට ආණ්ඩු මාරුවක් සඳහා ඉන්දියාවේ මැදිහත් වීමක් පවතින බවට පළවන මතිමතාන්තර, බොහෝ විට ඉන්දියාවේ රාජ්‍ය තාන්ත්‍රික ක්‍රියාකාරකම් හෝ කලාපීය ආරක්ෂාව කෙරේ ඔවුන් දක්වන අවධානය වැරදි ලෙස අර්ථනිරූපණය කිරීමේ ප්‍රතිඵලයක් විය හැකිය. එමෙන්ම, ඉන්දියාව තිරය පිටුපස සිට ක්‍රියාත්මක කරන මෙහෙයුම් සහ සන්නිවේදනයන්, හා එරට රාජ්‍ය තාන්ත්‍රික නිලධාරීන් සහ දේශපාලනඥයන් විසින් මහ පොළවේ සිදුකරන ක්‍රියාකාරකම් ද මීට හේතුවිය හැකි ය.
2022 දී චීනය සහ එක්සත් ජනපදය නිහඬ ව බලා සිටිද්දී, ශ්‍රී ලංකාවට සහාය දැක්වීමට ඉදිරිපත් වූයේ ඉන්දියාව පමණි. ජනතාව ඒ සම්බන්ධයෙන් සිය කෘතඥතාවය පළකළ යුතුය. එබැවින් ඉන්දියාවේ සද්භාවය වැරදි ලෙස අර්තකථනය කිරීමට ජනතාව ඉක්මන් නොවිය යුතු ය.
එක්සත් ජනපදයේ 35වන ජනාධිපති ජෝන් එෆ්. කෙනඩි වරක ප්‍රකාශ කර සිටියේ මෙවැන්නකි: “සාමකාමී විප්ලවයක් හට ගැනීම වැළැක්වීමට කටයුතු කරන්නෝ ප්‍රචණ්ඩකාරී විප්ලවයක් හට ගැනීම අනිවාර්ය කරති.“
කෙනඩි ගේ ප්‍රකාශය තුළින් ගම්‍ය වන්නේ, රටක අභ්‍යන්තර කටයුතු කෙරේ සුපිරි බලවතුන්ගේ අතපෙවීමේ පවතින ප්‍රතිවිපාකයි. මෙමඟින් සාමකාමී දේශපාලන පරිණාමයක් ඇතිවීම වළක්වන අතර, ගැටුමක් ඇති කිරීමට අතවනනු ලබයි.
අපගේ දුර්වල මූල්‍ය තත්ත්වයන් හමුවේ තවත් බංග්ලාදේශයක් බවට පත්වීමට අපට නොහැකි ය.
