සටහන – රුවන් නෙළුගොල්ල
ජනාධිපතිවරණය සම්බන්ධයෙන් පක්ෂයේ තීරණයට පිටින් යමින් රනිල් වික්‍රමසිංහ මහතාට සහාය දැක්වීමට එක්වූ ශ්‍රී ලංකා පොදුජන පෙරමුණේ සියලුම මන්ත්‍රීවරුන්ට එරෙහිව විනය පරීක්ෂණ ආරම්භ කිරීමට එම පක්ෂය තීරණය කර තිබේ.
ඒ අනුව, අද හෙටම ඒ පිළිබඳව අදාළ මන්ත්‍රීවරුන්ට ලිඛිත දැනුම්දීම් සිදුකරන බවයි ශ්‍රී ලංකා පොදුජන පෙරමුණේ මහලේකම්, පාර්ලිමේන්තු මන්ත්‍රී සාගර කාරියවසම් මහතා සඳහන් කරන්නේ.
එම මන්ත්‍රීවරුන් සම්බන්ධයෙන් වහාම විනය පියවර ගන්නා ලෙස පක්ෂයේ ක්‍රියාකාරිකයින් ඉල්ලා සිටින බව පැවසූ මහලේකවරයා ඒ අනුව මේ දිනවල ඊට අවශ්‍ය මූලික කටයුතු සිදුකෙරෙමින් පවතින බවත් ප්‍රකාශ කළේය.
අදාළ විනය පරීක්ෂණවලින් අනතුරුව ඔවුන්ගේ පක්ෂ සාමාජිකත්වය අහෝසි කිරීමට ද කටයුතු කෙරෙනු ඇති බවයි මහලේකම්වරයා වැඩිදුරටත් පැවසුවේ.
ජනාධිපතිවරයාට සහාය දැක්වීමට එක්වූ පොහොට්ටු මන්ත්‍රීවරුන් ගණන 92ක් බව ජනාධිපතිවරයාගේ පාර්ශ්වය ප්‍රකාශ කර ඇති අතර පොහොට්ටු පාර්ශ්වය පවසන්නේ එය ඊට අඩු ගණනක් බවයි.
