කොළඹ LNW: මාධ්‍ය වෙතින් හදන ප්‍රබන්ධ නායකයින් වෙනුවට ජනතාවගේ ක්‍රියාකාරීත්වයක ප්‍රතිඵලයක් ලෙස ජාතික ජන බලවේගයේ ජය සහතික වී ඇති බව එහි ජනාධිපති අපේක්ෂක අනුර කුමාර දිසානායක මහතා පැවසුවේය.
ඔහු මේ බව පැවසුවේ හිරියාලේදී පැවති ”දිනුම රටට රට අනුරට” මහජන රැළිය අමතමිනි.
”මීට කලින් ආණ්ඩු හදන්නේ මාධ්‍ය බලය තියෙන අය.මාධ්‍ය ප්‍රබන්ධ නායකයෝ හදනවා.වැඩකරන විරුවෝ,ආසියාවේ ලොකුම මොළය,මොළ හතේ නායකයෝ වගේ මාධ්‍ය විසින් ප්‍රබන්ධ නායකයෝ හදනවා. එහෙම ජන්ද කරපු ඉතිහාසයක් තියෙන්නේ. මාධ්‍ය විසින් බිය සැකය,අවලාද ගහනවා. වද කොත්තු,වද ඇඳුම්,වද දොස්තරලා එහෙම තමයි ආණ්ඩු හැදුවේ. හැබැයි අද අපිට මාධ්‍ය දීපු සහයෝගය තියෙනවා. ඒකට ගරු කරන ගමන් අද වෙද්දී ජයග්‍රහණය කරලා තියෙන්නේ මාධ්‍ය වෙතින් එහාට යන ජනතාවගේ ස්වයං ක්‍රියාකාරීත්වයක ප්‍රතිඵලයක් තමයි මේ ජයග්‍රහණය පිටිපස්සේ තියෙන්නේ. මෙතන ඉන්න හැම අම්මා තාත්තා කෙනෙක්ම කොච්චර කතා කළාද කොච්චර මහන්සි වුණාද? අපි දන්නවා. අපි වේදිකාවේ ඉදන් කතා කරනවා. අපි මේ රට හදන්න පුළුවන් සැලසුම් හදන්න පුළුවන් අයත් එක්ක එකතුවෙනවා. හැබැයි ජන්ද තියෙන්නේ ගමේ. ගමේ ජන්ද පෙට්ටිය පුරවන්න මාලිමාවට කතිරය ගහන්න ඔබ කොච්චර වෙහෙසක් දැරුවද? කීපාරක් ගෙවල්වලට ගියාද? කොට්ඨාස සභා හැදුවා. අව්වෙ වැස්සේ තෙමී තෙමී විශාල වෙහෙසක් දරුවා මේ ජයග්‍රහණය වෙනුවෙන්. ඒ නිසා ප්‍රබල මාධ්‍ය මෙහෙයුමෙකින් එහා ගියපු ජනතාවගේ ක්‍රියාකාරිත්වයකින් තමයි ජාතික ජන බලවේගයේ ජය සහතික කළේ” යනුවෙන් දිසානායක මහතා සඳහන් කරන ලදී.
ආශිකා බ්‍රාහ්මණ
