මේ වනවිට ස්වාධීන කණ්ඩායමක් ලෙස පාර්ලිමේන්තුවේ කටයුතු කරන පක්ෂ 11 කණ්ඩායම සහ පොදුජන පෙරමුණෙන් ස්වාධීන වූ මන්ත්‍රී කණ්ඩායම සමග තවදුරටත් සාකච්ඡා කිරීමට ආණ්ඩුව තීරණය කර තිබෙනවා. ඒ අනුව සාකච්ඡාවක් සඳහා පැමිණෙන්නැයි අදාල කණ්ඩායම් දෙකට ජනාධිපති ගෝඨාභය රාජපක්ෂ මහතා විසින් ආරාධනා කර තිබේ.
අද පස්වරුවේ මෙම සාකච්ඡාව පැවැත්වීමට නියමිතය.
මෙම ස්වාධීන කණ්ඩායම් දෙක විසින් අන්තර්කාලීන ආණ්ඩුවක් පිහිටුවීමට අදාල යෝජනා 11 ක් ඇතුළත් යෝජනා මාලාවක් මීට පෙර ජනාධිපතිවරයා වෙත යොමුකර තිබූ අතර අද පැවැත්වෙන සාකච්ඡාවේදී මෙම යෝජනා පිළිබඳව තවදුරටත් සාකච්ඡා කිරීමට නියමිතය.
පාර්ලිමේන්තුවේ තුනෙන් දෙකක බලයක් හිමි කරගෙන සිටි වත්මන් ආණ්ඩුවට එම තුනෙන් දෙකේ බලය අහිමි වී ඇති අතර එපමණක් නොව පාර්ලිමේන්තුවේ සරල බහුතරයද අහිමි වීමේ අවදානමක් මතුව තිබේ. මේ වනවිට ආණ්ඩු පාර්ශ්වය සතු මන්ත්‍රී ආසන ප්‍රමාණය 120 කටත් වඩා අඩු මට්ටමක පවතී.
මේ අතර ආණ්ඩුවට විස්වාසභංග යෝජනාවක් පාර්ලිමේන්තුවට ඉදිරිපත් කිරීමේ සූදානමක්ද පවතින බැවින් ස්වාධීනව සිටින කණ්ඩායම්වල සහයෝගය ආණ්ඩුවට අතිශය වැදගත් වේ.
UN
