රෂිකා හෙන්නායක ඔක්තෝබර් 28, කොළඹ (LNW):
ජනතාවට සහන මිලට පොල් අලෙවි කිරීමේ ජංගම රථ සේවාව අද (28) දින නාරාහේන්පිට කම්කරු කාර්යාල පරිශ්‍රයේ දී ක්‍රියාත්මක කරන බව පොල් වගා කිරීමේ මණ්ඩලය පවසයි.
පෙරවරු 9.00 සිට පොල් අලෙවි කිරීමේ ජංගම රථ සේවාව විවෘත වන අතර එහිදී ලොකු පොල් ගෙඩියක් රුපියල් 120කට ලබාගත හැකි බව සඳහන් වේ.
මෙම ස්ථානයට පැමිණෙන පාරිභෝගික ජනතාවට පොල් ගෙඩි 5 බැගින් අලෙවි කරන බවත් ගැබිනි මාතාවන්ට සහ වයෝවෘද්ධ පුද්ගලයන්ට පොල් ගෙඩි 10 බැගින් අලෙවි කරනු ලබයි.
තවද, හෙට (29)දින දෙහිවල නගරයේ දී පාරිභෝගික ජනතාව වෙනුවෙන් පොල් අලෙවි කරන බව පොල් වගා කිරීමේ මණ්ඩලය පවසයි.
