නව රජයේ සෞඛ්‍ය අමාත්‍යවරයා වශයෙන් ජාතික ජන බලවේගයේ මහලේකම්, විශේෂඥ වෛද්‍ය නිහාල් අබේසිංහ මහතා පත්කෙරෙනු ඇති බව ආරංචිමාර්ග පවසයි.
ආයෝජන ප්‍රවර්ධන, සංචාරක හා ජනමාධ්‍ය අමාත්‍ය ධුර වෛද්‍ය නලින්ද ජයතිස්ස මහතාට ලැබෙනු ඇති බව සඳහන්.
ජාජබ ජනප්‍රියතම නායකයකු වන කේ. ඩී. ලාල්කාන්ත මහතා කෘෂිකර්ම අමාත්‍ය ධුරයට පත්කෙරෙනු ඇති බවකුත් වාර්තා විය. මීට පෙර ඒ මහතා 2004 – 2005 සමයේ ග්‍රාමීය කර්මාන්ත අමාත්‍ය ධුරය ද දැරුවේ ය.
ජාජබ රජයක මුදල් අමාත්‍යවරයා වශයෙන් පත් කෙරෙනු ඇතැයි මාධ්‍ය සහ සමාජ මාධ්‍ය වාර්තා පළ වී තිබුණු සුනිල් හඳුන්නෙත්ති මහතා කර්මාන්ත අමාත්‍යවරයා වශයෙන් පත්කෙරෙනු ඇති බව සඳහන්. ඒ මහතා ඉහත කී ජවිපෙ – ශ්‍රීලනිප සන්ධාන ආණ්ඩු සමයේ ග්‍රාමීය කර්මාන්ත නියෝජ්‍ය අමාත්‍යවරයා වශයෙන් කටයුතු කර තිබිණි.
කෙසේවෙතත් මේ සියල්ල තහවුරු නොකළ ආරංචිමාර්ගවලින් පැවසෙන දෑ වන අතර මේවා වෙනස් වීමට ද ඉඩ තිබේ.
