කොළඹ LNW:හිටපු අමාත්‍යවරයෙකු වන එක්සත් ජනරජ පෙරමුණේ නායක පාඨලී චම්පික රණවක මහතාට පනවා තිබුණු විදෙස් ගමන් තහනම කොළඹ මහාධිකරණය අද (10) තාවකාලිකව ඉවත් කර තිබේ.
2016 වසරේ රාජගිරිය ප්‍රදේශයේදී බරපතල රිය අනතුරක් සිදුකිරීමේ චෝදනාවට සම්බන්ධ නඩුකරය මඟින් එම තහනම පනවා තිබුණු අතර මෙම නඩුව අද කැඳවූ අවස්ථාවේදී විත්තිකාර රණවක මහතා වෙනුවෙන් පෙනී සිටි නීතීඥවරයා අධිකරණය හමුවේ කරුණු දක්වමින් තම සේවා දායකයාට පෞද්ගලික කටයුත්තක් සඳහා විදේශගත වීමට අවශ්‍යව තිබෙන බව දැනුම් දී ඇත.
ඒ සඳහා දැනට පනවා තිබෙන විදේශ ගමන් තහනම අද දින සිට ලබන අප්‍රේල් මස 20 දක්වා කාල සීමාව තුළ තාවකාලිකව ඉවත් කිරීමේ නියෝගයක් නිකුත් කරන ලෙසයි නීතිඥවරයා අධිකරණයෙන් ඉල්ලා සිටියේ.
ඒ අනුව ඉල්ලීම පිළිගත් අධිකරණය අදාළ කාලසීමාව තුළ පාඨලී චම්පික රණවක මහතාට පනවා තිබූ විදේශ ගමන් තහනම තාවකාලිකව ලිහිල් කිරීමට නියෝග කළ අතර අප්‍රේල් මස 20 වැනිදා ඔහුට යළි අධිකරණය හමුවේ පෙනී සිටින ලෙස නියෝග කළේය.
ආශිකා බ්‍රාහ්මණ
