සටහන: සශිකලා මධුෂාණි
මැයි 11; ලෝකය(අවුට්බවුන්ඩ් ටුඩේ): එක්සත් ජනපද ජනාධිපති ඩොනල්ඩ් ට්‍රම්ප්ගේ මැදිහත්වීමෙන් ඉන්දියාව හා පකිස්ථානය අතර ඊයේ(10)දිනයේ ඇතිවූ සටන් විරාමයෙන් අනතුරුව ඉන්දීය පාලිත කාශ්මීරයේ ජම්මු හා ශ්‍රී නගර්හි පිපිරීම් වාර්තා වන බව ජාත්‍යන්තර මාධ්‍ය වාර්තා කර තිබේ.
සටන් විරාම ගිවිසුමකින් පැය කිහිපයකට පසු, ඉන්දියාව සහ පාකිස්තානය සටන් විරාමය උල්ලංඝනයන් පිළිබඳ එකිනෙකාට චෝදනා කරගනිමින් සිටින අතර එය එහි අස්ථාවරත්වය අවධාරනය කරයි.
මේ සම්බන්ධයෙන් පාකිස්තානයේ විදේශ කටයුතු අමාත්‍යංශය නිවේදනය කර තිබුණේ, ඉන්දියාව විසින් සමහර ප්‍රදේශවල සිදු කරන උල්ලංඝනයන් නොතකා, පකිස්ථානය ගිවිසුම ක්‍රියාත්මක කිරීමට කැපවී සිටින බවත්, භූමියේ සිටින හමුදා සංයමයෙන් කටයුතු කළ යුතු බවත්ය.
සටන් විරාමය තහවුරු කරමින් ඉන්දියාවේ විදේශ කටයුතු අමාත්‍ය එස්. ජයශංකර් පැවසුවේ දෙරට වෙඩි තැබීම් නැවැත්වීම සහ හමුදා ක්‍රියාමාර්ග පිළිබඳ අවබෝධයක් ඇති කර ගෙන ඇති බවත්, ඉන්දියාව සෑම ආකාරයකින්ම ත්‍රස්තවාදයට එරෙහිව ස්ථිර ස්ථාවරයක් නිරන්තරයෙන් පවත්වා ගෙන ගොස් ඇති බවත්, එය ඉදිරියටත් පවත්වාගෙන යනු ඇති බවත්ය.
