නිශ්මං රණසිංහ මැයි 19, කොළඹ LNW:
ආසියානු අවුරුදු 22 න් පහළ සහ ආසියානු යොවුන් බොක්සිං තරගාවලිය ක්‍රියාත්මක වන කොළඹ සුගතදාස ක්‍රීඩාංගණයේ දී මැයි 18 වන දා පැවති තරගවලදී ශ්‍රී ලංකාවට ජයග්‍රහණ ලබා ගැනීමට නොහැකි වුණා.එම දිනය පුරා ශ්‍රී ලංකා ක්‍රීඩිකාවන් සිව්දෙනෙකු තරග බිමට පිවිසියත් ඒ කිසිවෙකුට සහභාගි වූ තරගවලදී ජයග්‍රහණ හිමි වුණේ නැහැ.
කිලෝ ග්‍රෑම් 48 බර පංතියේදී ශ්‍රී ලංකා ක්‍රීඩිකා නෙත්මි පෙරේරා තරග වැදි තරගයේ දෙවන වටයේදී, විනිසුරු විසින් තරගය නවතා ඇයගේ ප්‍රතිවාදි ක්‍රීඩිකාව වූ ඉන්දියාවේ සිවාච් මහීට ජයග්‍රහණය පිරිනමනු ලැබුවා.කිලෝ ග්‍රෑම් 50 බර පංතියෙන් තරග වැදුණු සචිනි ප්‍රනාන්දු 5-0 ක් වූ තිරණයකින් වියට්නාමයේ එන්ගුයෙන් ති එන්ගොක් ට්‍රාන් වෙතින් පරාජය ලැබුවා.
කිලෝ ග්‍රෑම් 52 බර පංතියෙන් තරග වැදුණු යශිනි ප්‍රනාන්දු පරාජයට පත් වුණේ 5- 0 ක තීරණයක් අනුවයි.යශිනිට එරෙහිව කසකස්තානයේ මයිර්ෂකූල් ටොමිරිස් ජය ගනු ලැබුවා.කිලෝ ග්‍රෑම් 54 බර පංතියේදී වියට්නාමයේ න්ගෝ තී මායි චුක්ට තරගයේ පළමු වටයේදීම ජයග්‍රහණ හිමි වුණා.එහිදී පරාජයට පත් වුණේ සංදීපනී කාරියවසම් ය.
ඡායාරූපයේ දැක්වෙන්නේ සංදීපනි කාරියවසම් සහ වියට්නාම ක්‍රීඩිකාව අතර පැවති තරගයේ අවස්ථාවකි.
